उत्तर प्रदेश के मुख्यमंत्री योगी आदित्यनाथ इतवार का जनता दर्शन के दौरान भरोसा जताइन कि सबका समस्या के समाधान करब सरकार के जिम्मेदारी अउर संकल्प आय। मुख्यमंत्री योगी गोरखपुर प्रवास के दूसरे दिन इतवार के सकारे गोरखनाथ मंदिर मा जनता दर्शन मा करीब 150 लोगन के दुख-तकलीफ सुनिन। उंई कहिन कि हर मनई के समस्या के समाधान करब सरकार के सबसे बड़ी प्राथमिकता आय।
बिना भेदभाव के मिले न्याय, भू-माफिया अउर दबंगों पर होय कड़ा एक्शन
एक सरकारी बयान के हिसाब से, जनता दर्शन के दौरान मुख्यमंत्री अधिकारिन का हुकुम दीन कि मामला के निपटारा तेजी अउर संवेदनशीलता के साथ कीन जाय। उंई कहिन कि बिना कौनों भेदभाव के सब का न्याय मिले, जे पात्र अहैं उनका जनकल्याणकारी योजना के लाभ मिले, जरूरतमंद लोगन के इलाज पक्का कीन जाय अउर भू-माफिया अउर दबंग लोगन के खिलाफ कड़ा एक्शन लीन जाय।
इलाज खातिर तुरंतै मिली पइसा, बिटिया के बियाह खातिर मिली ₹1 लाख
जनता दर्शन मा एक मेहरारू बिटिया के बियाह खातिर आर्थिक मदद के गोहरा लगाइस। मुख्यमंत्री ओका मुख्यमंत्री सामूहिक विवाह योजना के तहत हर जोड़ा का एक लाख रुपया मिले के जानकारी दीन अउर अधिकारिन का कागजी कार्रवाई पूरी करे का कहिन। गंभीर बीमरी के इलाज खातिर आय लोगन का मुख्यमंत्री भरोसा दिलाइन कि पइसा के कमी से केहू के इलाज नाहीं रुकी। उंई अधिकारिन का निर्देश दीन कि जरूरतमंद लोगन के इलाज मा होय वाले खरच के अंदाजा जल्दै लगाय के बतावा जाय, ताकि सरकार तुरंतै बजट मुहैया कराय सके। योगी राजस्व अउर कानून-व्यवस्था से जुड़ा मामला मा भी तुरंत निपटारा करे के निर्देश दीन।
