यूक्रेन रूस पर अब तक कय सबसे बड़ ड्रोन हमला किहिस है। सारी रात चले इन हमला मा मॉस्को समेत रूस के कइयौ इलाकन का निशाना बनावा गवा। रूस के अधिकारिन कै मानब जाय तौ यहि हमला मा 500 से ज्यादा ड्रोन इस्तेमाल कीन गय रहेन। अधिकारिन यहि हमला का रूसी राजधानी क्षेत्र पर एक साल से बेसी समय मा भवा सबसे बड़ हमला बतावा है। यहि हमला मा कम से कम चार लोगन कै जान चली गयी अउर कइयौ अउर घायल होय गय। साथै मा, अलग-अलग इलाकन मा रहै वाली इमारतन अउर जरूरी सुविधवन का भी नुकसान पहुँचा है।
रूस 556 ड्रोनन का कइहिस तबाह
रूस के रक्षा मंत्रालय बतायस है कि रात भर चले यहि हमला के दौरान ओकर हवाई सुरक्षा तंत्र एक दर्जन से बेसी इलाकन मा यूक्रेन के 556 ड्रोनन का रोकिके तहस-नहस कइ दिहिस। यहि दौरान मॉस्को अउर पच्छिमी रूस के आसपास धमाकन अउर आपाधापी मा बचाव कारजन कै खबरि भी आईं। स्थानीय अधिकारिन के मुताबिक, इन हमला मा कम से कम चार लोगन कै जान चली गयी। इनम से तीन लोगन कै मौत मॉस्को क्षेत्र मा अउर एक मनई कै मौत यूक्रेन की सरहद के लगे बेलगोरोद क्षेत्र मा भई।
मॉस्को क्षेत्र के गवर्नर आंद्रेई वोरोब्योव बताइन कि इन हमला मा कम से कम तीन लोगन कै मौत भई है। वोरोब्योव के हिसाब से, एक ड्रोन के निजी घर से टकराये की वजह से एक मेहरारू कै मौत होय गयी, जबकि बचाव काम के दौरान एक अउर मनई कइयौ घंटा तक मलबे के नीचे दबा रहा।
भिनसारे शुरू भये हमले
हमला से जुड़ी अलग-अलग घटनान मा दू लोगन के मारे जाय की भी खबरि है। वोरोब्योव टेलीग्राम पर लिखिन, “एक प्राइवेट घर पर यूएवी गिरै से एक मेहरारू कै मौत होय गयी। एक अउर मनई मलबे के नीचे दबा है।” उई आगे बताइन कि हमले भिनसारे तड़के शुरू भयेन अउर रूसी एयर डिफेंस यूनिटन का लगातार काम करै पर मजबूर कइ दिहिन। उई कहिन, “भोरहरी 3 बजे से एयर डिफेंस फोर्सेज राजधानी के इलाके पर बड़े पैमाने पर होय रहे यूएवी हमला कै जवाब दइ रही हैं।”
साथै मा बताइन कि यहि हमला के दौरान कम से कम चार लोग घायल भये अउर कइयौ इंफ्रास्ट्रक्चर सुविधवन का निशाना बनावा गवा। हालांकि मॉस्को अउर आसपास के इलाकन का पहिले भी यूक्रेनी ड्रोनन द्वारा निशाना बनावा गवा है, मुला सीधे रूसी राजधानी का परभावित करै वाले हमले कमै देखै का मिले हैं।
जेलेंस्की देहे रहेन चेतावनी
रूसी अधिकारिन तुरंते इंफ्रास्ट्रक्चर के नुकसान की पूरी जानकारी नाहीं दिहिन, मुला अधिकारिन इशारा कीन कि रहै वाले इलाके अउर खास ठिकाने ही हमला कै मुख्य निशाना रहेन। ये ताज़ा हमले यूक्रेन के राष्ट्रपति वोलोदिमीर जेलेंस्की के ओहि बयान के कुछै दिन बाद भयेन, जेहिमा उई कीव पर रूस के एक बड़े हमले के बाद कड़ा जवाब देबै की कसम खाय रहेन। ओहि हमले मा 24 लोगन कै जान चली गयी रही। जेलेंस्की चेतावनी देहे रहेन कि यूक्रेन के शहरन अउर आम मनई पर लगातार हमला करै के नाते मॉस्को का नतीजा भुगतै का पड़ी।
हाल के दिनन मा, कैदी अदला-बदली पूरी होय के बाद अउर तीन दिन कै जो कामचलाऊ युद्धविराम रहा, ओकरे टूटे के बाद मॉस्को अउर कीव के बीच हवाई हमले तेज होय गये हैं। यह युद्धविराम इसी हफ़्ते खतम भवा रहा।
