राष्ट्रपति द्रौपदी मुर्मू सोमई दिन राष्ट्रपति भवन मा आयोजित एक नागरिक अलंकरण समारोह मा बॉलीवुड अभिनेता धर्मेंद्र अउर शास्त्रीय संगीतकार व वायलिन वादक एन राजम का मरणोपरांत पद्म विभूषण से सम्मानित कीनिन। कला के क्षेत्र मा असाधारण अउर खास योगदान बरे धर्मेंद्र का दीन्हा गवा ई पुरस्कार उनकी पत्नी अउर सांसद हेमा मालिनी ग्रहण कीनिन। राजम का भारतीय शास्त्रीय संगीत मा उनकेरे अहम योगदान बरे, खास कइके ‘गायकी अंग’ शैली के माध्यम से वायलिन प्रस्तुति का नया रूप देवे बरे दूसरे सबसे बड़े नागरिक सम्मान से सम्मानित कीन गवा। राजम पंडित ओंकारनाथ ठाकुर से संगीत के गुर सीखे रहीन्।
मुर्मू उत्तराखंड के पूर्व मुख्यमंत्री भगत सिंह कोश्यारी; चुनौतियन क सामना कइ रही पारंपरिक भारतीय कला ‘अवधान’ का फिर से जिंदा करइ वाले शतावधानी आर गणेश; कोटक महिंद्रा बैंक के संस्थापक उदय सुरेश कुमार कोटक; अउर पेट रोग विशेषज्ञ कल्लीपट्टी रामासामी पलानीस्वामी का पद्म भूषण से सम्मानित कीनिन। राष्ट्रपति विज्ञापन गुरु पीयूष पांडे अउर पूर्व सांसद विजय कुमार मल्होत्रा का भी मरणोपरांत ई सम्मान से नवाजिन। पांडे केरे पत्नी अउर मल्होत्रा केरे बेटवा ई सम्मान ग्रहण कीनिन।
भारतीय महिला क्रिकेट टीम क कप्तान हरमनप्रीत कौर भुल्लर, अभिनेता प्रोसेनजीत चटर्जी, पैरा एथलीट प्रवीण कुमार अउर केंद्रीय रिजर्व पुलिस बल (सीआरपीएफ) के पूर्व महानिदेशक के. विजय कुमार का पद्मश्री से सम्मानित कीन गवा।
राष्ट्रपति भवन के गणतंत्र मंडप मा भये ई समारोह क शुरुआत राष्ट्रगीत वंदे मातरम के गायन से भई, जेकरे बाद राष्ट्रगान ‘जन गण मन’ गावा गवा। कार्यक्रम मा उपराष्ट्रपति सी पी राधाकृष्णन, प्रधानमंत्री नरेन्द्र मोदी अउर केंद्रीय गृह मंत्री अमित शाह समेत कई गणमान्य लोग सामिल भये।
राष्ट्रपति साल 2026 बरे 131 पद्म पुरस्कार देवे क मंजूरी दीन्हिन है। इनमां पांच पद्म विभूषण, 13 पद्म भूषण अउर 113 पद्म श्री शामिल हैं। ई पुरस्कार दुई अलग-अलग अलंकरण समारोह मा दीन्हे जायेक हैं।
पद्म पुरस्कारन क घोषणा हर साल गणतंत्र दिवस के मउका पर कीन जाति है। ई प्रतिष्ठित नागरिक सम्मान कला, सामाजिक काम, सार्वजनिक मामला, विज्ञान अउर इंजीनियरिंग, व्यापार अउर उद्योग, चिकित्सा, साहित्य अउर शिक्षा, खेल अउर सिविल सेवा समेत अलग-अलग क्षेत्रन मा दीन्हे जात हैं।
