अमेरिका अउर ईरान के बीच तनातनी कम होवै के संदेसा मिलै के बीच, ब्रिटिश नौसेना घलव होर्मुज जलडमरूमध्य (स्ट्रेट) से बेपारी जहाजन के बिना रोक-टोक आवै-जाइ बरे समुद्री बारूदी सुरंग हटावै कै तैयारी कइ लिहिस है।
जिब्राल्टर मा तैनात आरएफए लाइम बे पर सैकड़न के गिनती मा नौसैनिक एही मिशन मा हिस्सा लेवै का बाट जोहत हैं। बताइ दी कि होर्मुज स्ट्रेट मा दबाव बनावै बरे आइआरजीसी नौसेना भारी मात्रा मा समुद्री बारूदी सुरंग बिछाय के रक्खे अहइ। साथे-साथ ई हुकूम घलव दियिस है कि होर्मुज से जाय वाले जहाजन का आइआरजीसी के बतवाए रास्ते पर ही चलइ का परी।
ईरान के साथै लड़ाई के दौरान होर्मुज स्ट्रेट मा आवै-जाइ का नीक बनावै बरे बारूदी सुरंग हटावै का कउनो सँगाती देस जब आगू नाहीं आवा, तउ अमेरिकी राष्ट्रपति डोनाल्ड ट्रंप नाटो देसन का खरी-खोटी सुनाएन रहें। हुवाँ, नाटो देसन कै कहब रहा कि ओन्हैं ईरान कै लड़ाई मा हिस्सा नाहीं लेइ का है, बलुक जब माहौल ठीक होइ जाई तब ओय होर्मुज से माइंस हटावै मा मदद करइ का तैयार हैं।
लाइबेरियन प्रायद्वीप के दक्खिनी छोर पर, ब्रिटिश विदेशी इलाका जिब्राल्टर मा, ब्रिटेन कै रायल नेवी अइसन करइ कै तैयारी करत अहइ, मुला ई तबै होइ जब कउनो सांति समझौता होइ जाई। ट्रंप सनीचर के दिन कहेन कि ईरान के साथे समझौता का लै के बड़ी सहमती बनि चुकी है, मुला अभी एका आखिरी रूप देब बाकी अहइ।
ब्रिटेन के रक्षा मंत्री अर कार्न्स हियँ की मीडिया के साथे आरएफए लाइम बे कै दौरा कीन। ई जंगी जहाज पर ब्रिटेन अउर फ्रांस, दुनहुँ देसन के सिपाही सवार अहैं। ई एक्ठु एंफिबियस जंगी जहाज अहइ, जेह पर हथियार अउर समुद्री माइंस का तबाह करइ वाले समुद्री ड्रोन लदे अहैं।
ईरान इजरायली जासूसी ड्रोन का मारि गिराइस
ईरानी सेना होर्मुजगान सूबा के ऊपर उड़त इजरायल के जासूसी टोही ड्रोन का मारि गिरावै कै दावा कीन है। रायटर मेहर न्यूज एजेंसी के हवाले से बताइस कि ईरानी नौसेना के जवान इजरायली आर्बिटर ड्रोन कै मलबा खोजि निकारे अहैं।
