आजु के समय मा हर कउनो पइसा कमावै क शॉर्टकट तरीका अपनावत अहै। कुछु लोग बिना मेहनत पइसा कमावै क जुगाड़ बनावत हैं तौ कइउ बेर कम निवेश मा ढेर फायदा पावै क लालच रखत हैं। ई लालच लोगन पै भारी परि सकत अहै। सोशल मीडिया अउर फोन के SMS के जरिया भेजी गय लिंकन से लोगन का ठगा जा रहा अहै। अब सोशल मीडिया पर केंद्रीय वित्त मंत्री के नाउं पर बड़ा स्कैम (घोटाला) प्लान कीन जा रहा अहै। ठगन कइती से ‘Quantum AI’ नाउं के फर्जी निवेश योजना के जरिया पइसा ऐंठै क काम कीन जा रहा अहै। कइउ बेर लोग ई योजना के बारे मा बिना जाने-बूझे मा पइसा भी लगाय (इन्वेस्ट) देत हैं।
22 हजार पर ₹3 लाख कमावै क मौका
‘Quantum AI’ नाउं के फर्जी निवेश स्कीम बनाय के लोगन का भ्रमित कीन जा रहा अहै। ठगन कइती से पीएम मोदी अउर वित्त मंत्री समेत कइउ बड़ी हस्तियन के फोटू क भी इस्तेमाल कीन जा रहा अहै। वायरल होय रहे ई वीडियो संदेस मा ई दावा कीन जा रहा अहै कि सरकार कइती से एक नई सरकारी योजना के तहत कउनो भी मनई सिर्फ ₹22,000 जमा करै पर एक महीना मा ₹3 लाख तक कमाय सकत अहै।
निवेश ना करै क सलाह
PIB Fact Check जानकारी दिहिस अहै कि ई ठगन क चाल अहै। सरकार कइती से अइसन कउनो योजना नाहीं चलाई जात अहै। पीआईबी बतायस कि न तौ केंद्रीय वित्त मंत्री अउर न ही भारत सरकार कउनो अइसन निवेश योजना या प्लेटफॉर्म क समर्थन करत अहैं। ओन्हैं बतायस कि अइसन संका वाले लिंक अउर प्लेटफॉर्मन से बचिके (सतर्क) रहैं, जे लोगन का आर्थिक नुकसान पहुँचावै के मकसद से बनावा जात हैं।
फर्जी लिंक क सिकायत करैं
PIB साफ कहिस अहै कि सरकार कइती से न तौ अइसन कउनो योजना चलाई जात अहै अउर न ही अइसन कउनो योजना क समर्थन कीन जात अहै। जउं आपन का अइसन कउनो संदेस या लिंक मिलत अहै तौ आप PIB मा एकर सिकायत भी कइ सकत अहैं। सिकायत बरे वाट्सएप्प नंबर +91 8799711259 या फिर factcheck@pib.gov.in पर मेल भी कइ सकत अहैं।
