राष्ट्रपति द्रौपदी मुर्मू सोमवार क राष्ट्रपति भवन मा आयोजित एक नागरिक अलंकरण समारोह मा बॉलीवुड अभिनेता धर्मेंद्र अउर शास्त्रीय संगीतकार अउर वायलिन वादक एन राजम क मरणोपरांत पद्म विभूषण से सम्मानित कीनिन। कला क क्षेत्र मा असाधारण अउर खास योगदान बरे धर्मेंद्र क मिला ई पुरस्कार उनकर मेहरारू अउर सांसद हेमा मालिनी ग्रहण कीनिन। राजम क भारतीय शास्त्रीय संगीत मा उनकर खास योगदान बरे, खासकर ‘गायकी अंग’ शैली के जरिया वायलिन प्रस्तुति क नवा रूप देवे बरे दूसर सबसे बड़ नागरिक सम्मान से सम्मानित कीन गा। राजम पंडित ओंकारनाथ ठाकुर से संगीत क गुर सीखे रहिन।
मुर्मू उत्तराखंड क पूर्व मुख्यमंत्री भगत सिंह कोश्यारी; चुनौतिन क सामना करत पारंपरिक भारतीय कला ‘अवधान’ क फिर से जियरावै वाले शतावधानी आर गणेश; कोटक महिंद्रा बैंक क संस्थापक उदय सुरेश कुमार कोटक; अउर पेट रोग विशेषज्ञ कल्लीपट्टी रामासामी पलानीस्वामी क पद्म भूषण से सम्मानित कीनिन। राष्ट्रपति विज्ञापन गुरु पीयूष पांडे अउर पूर्व सांसद विजय कुमार मल्होत्रा क भी मरणोपरांत ई सम्मान से नवाजिन। पांडे क मेहरारू अउर मल्होत्रा क बेटवा ई सम्मान पाइन।
भारतीय महिला क्रिकेट टीम क कप्तान हरमनप्रीत कौर भुल्लर, अभिनेता प्रोसेनजीत चटर्जी, पैरा एथलीट प्रवीण कुमार अउर केंद्रीय रिजर्व पुलिस बल (सीआरपीएफ) क पूर्व महानिदेशक के. विजय कुमार क पद्मश्री से सम्मानित कीन गा।
राष्ट्रपति भवन क गणतंत्र मंडप मा भा ई समारोह क शुरुआत राष्ट्रगीत वंदे मातरम के गायन से भइ, जेहके बाद राष्ट्रगान ‘जन गण मन’ गावा गवा। कार्यक्रम मा उपराष्ट्रपति सी पी राधाकृष्णन, प्रधानमंत्री नरेन्द्र मोदी अउर केंद्रीय गृह मंत्री अमित शाह समेत कइयो दिग्गज लोग सामिल भइन।
राष्ट्रपति साल 2026 बरे 131 पद्म पुरस्कार देवे क मंजूरी दिहीन अहै। इन्हमा पांच पद्म विभूषण, 13 पद्म भूषण अउर 113 पद्म श्री सामिल अहैं। ई पुरस्कार दुई अलग-अलग अलंकरण समारोह मा दीन जाइ। पद्म पुरस्कारन क घोषणा हर साल गणतंत्र दिवस क मौका पर कीन जात्य हय। ई प्रतिष्ठित नागरिक सम्मान कला, सामाजिक काम, सार्वजनिक मामला, विज्ञान अउर इंजीनियरिंग, व्यापार अउर उद्योग, चिकित्सा, साहित्य अउर शिक्षा, खेल अउर सिविल सेवा समेत कइयो क्षेत्रन मा दीन जात अहै।
