कुछ लोगन खातिर फैटबाइक्स तेज अउर स्टाइलिश आवै-जावै क साधन आय, तौ कवनो खातिर साइकिल ट्रैक पै आफत। एम्स्टर्डम मा फैटबाइक्स का लै क एतनी सिकायत मिली कि अधिकारिन इन्हन पै अइसन रोक लगाय दीहिन जौन पहिले कबहूँ नाहीं लाग रहा। बच्चन मा बहुतै पसंद कीन जाय वाली ई फैटबाइक्स असल मा बिजुरी (इलेक्ट्रिक) वाली साइकिल आयं। ई देखै मा छोटकी मोटरसाइकिल जइसन लागत हीं अउर ६० किलोमीटर प्रति घंटा क रफ़्तार ते चलि सकत हीं। ई बाइक्स का इनकर बहुतै मोटा टायर होवै क वजह ते ‘फैटबाइक्स’ नाउँ मिला अहैं।
साइकिल चाहै वाले फैटबाइक्स का मानत हैं आफत
अपने बराबर जमीन खातिर मसहूर नीदरलैंड्स मा साइकिल क डहरन पै जगह पाय खातिर होड़ मचावत कइयौ पुरान ढंग क साइकिल चलावै वाले फैटबाइक्स का ओकर तेज रफ़्तार अउर बड़े आकार क वजह ते एक मुसीबत मानत हैं। डच सहरन मा फैटबाइक गिरोह क हुमच क घूमब अउर हड़कंप मचावै क सिकायतन भी आम अहैं। एम्स्टर्डम मा इन फैटबाइक चलावै वालन क खिलाफ एक अर्जी (याचिका) पै २४०० लोगन दस्तखत कीहिन हैं। ई अर्जी मा सिकायत कीन गयी अहै कि पटरी (फुटपाथ) अब रेस करै क मैदान बनि गय हैं। अब आम जगहें सुरच्छित नाहीं लागत हैं।
अधिकारिन कीहिन काररवाई
एही बरे सहर क अधिकारिन वोंडेलपार्क मा इन्हन पै रोक लगावै क फैसला कीहिन अहै। ई बहुतै ब्यस्त पार्क आय, जहाँ क लोकल मनई अउर भाड़ा क साइकिल चाहे रोलर स्केट्स लै क आवै वाले ढेरन सैलानी आवत हैं। एम्स्टर्डम क जौन अधिकारी मेलानी वैन डेर हॉर्स्ट ई रोक लगाइन हैं, ओन्हैं कहा कि, हमका बहुतै जादे सिकायत मिलत बाटी। कुछ साल पहिले हमका फैटबाइक्स क बारे मा खाली २० क आस-पास सिकायत मिलत रही। अब हमार पासे २००० ते भी जादे सिकायतन आइ चुकी हैं।
अधिकारी आगू कहिन कि आफत खड़ा करै क अलावा एहमा सुरच्छा क भी सवाल अहै, खासकर बच्चन मा फैटबाइक्स क बढ़ती दीवानगी का देखत भये। फैटबाइक्स क सबसे जादे रफ़्तार २५ किलोमीटर प्रति घंटा होइ चाही, मुला जादे तर लोग इन्हन का गैर-कानूनी तरीका ते बदल क (मॉडिफाई कइके) इनकर स्पीड ५० ते ६० किलोमीटर प्रति घंटा तक बढ़ाय लेत हैं।
छोटे-छोटे लरिका तेज रफ़्तार मा दौड़ावत हैं फैटबाइक्स
वैन डेर हॉर्स्ट कहिन, “तनिक सोचौ, एक ११ साल क लरिका एक बड़ी, मॉडिफाई कीन गयी फैटबाइक पै ५० किलोमीटर प्रति घंटा क रफ़्तार ते जाइ रहा होय। ई बहुतै खतरनाक बात आय।” ओन्हैं बताया कि फैटबाइक क एक्सीडेंट क बाद कइयौ बच्चन का चोट लागै पै अस्पताल पहुँचावै क परा अहै। वोंडेलपार्क आवै वाले लोगन जादे तर ई बैन क सुआगत कीहिन। फुटबॉल कोच अलेक्जेंडर रैंकोविक कहिन, “हमका नाहीं लागत कि कवनो चीज पै रोक लगावै क चाही, मुला हमार मानब अहै कि ओन्हैं सायद एक तय उमर ते कम क बच्चन पै बैन लगाय क सुरु करै क चाही रहा, काहे से हमका लागत है कि यही सबते बड़ी समस्यै आय।”
अब लागी जुर्माना
अगिले हफ्ता ते वोंडेलपार्क मा फैटबाइक चलावत पकड़े जाय पै कवनो मनई पै जुर्माना लगावा जाई। १२ ते १५ साल क बच्चन का आधा जुर्माना देइ क परी। १२ साल ते कम उमर क बच्चन पै जुर्माना नाहीं लागी, मुला उनके महतारी-बाप का एकर जानकारी दीन्ह जाई।
