पच्छिम बंगाल कय पूर्व मुख्यमंत्री ममता बनर्जी अतवार का भाजपा पर “राज्य आतंकवाद” कय आरोप लगाइन औ कहिन कि उ पार्टी कय काररवाई कय संबैधानिक औ कानूनी तरीका से मुकाबला करत रहिहैं। दल कय कार्यकर्तान औ समर्थकन का संबोधित करत भय तृणमूल कांग्रेस प्रमुख हावड़ा रेलवे इस्टेशन कय लगे हालि ही मा भय तोड़फोड़ कय निंदा करिन औ संबिधान अउर न्यायपालिका कय हवाला दीन। बनर्जी कहिन कि, “मइँ न्यायपालिका का याद दिलावइ चाहित हौं कि उ सब कानून कय सच्चा रखवार आंय… मइँ राज्य आतंकवाद कय खिलाफ कानूनी लड़ाई जारी राखब। मइँ देखब कि केकर ताकत ढेर अहै, संबिधान कय कि बंदूक कय नली कय।”
उनकर ई टिप्पणी यहि महीना कय सुरूआत मा हावड़ा रेलवे इस्टेशन कय लगे कथित गैर-कानूनी ढांचा का ढहाए जाए कय बाद बढ़त राजनीतिक खिंचातान कय बीच आई अहै। ई अभियान भारी पुलिस बल कय तैनाती औ बुलडोजर व अउर मशीनन कय मदद से चलावा गा रहा।
टीएमसी सुप्रीमो केंद्र सरकार पर भी हमला बोलिन औ भाजपा का आगू आवइ वाले दिनन मा राजनीतिक परिणाम कय चेतावनी दीन। उ कहिन कि, “जब आप दिल्ली मा सत्ता से उतरिहौ, तौ अपने काम कय नतीजा भुगतइ का परी — हम ओहि दिन कय बाट जोहत हन।”
अपनी सरकार कय पुरान पुनर्वास नीतियन से तुलना करत भय, बनर्जी कल्याणी एक्सप्रेस सेतु परियोजना कय उदाहरण दीन। उ आरोप लगाइन कि, “कल्याणी एक्सप्रेस सेतु कय बनइ कय समइ सड़क पर 43 घर प्रभावित भये रहेन, औ हम उनके पुनर्वास कय तईं ठीक वइसने ही 43 घर बनवाया रहा। अब हुवां लूटपाट, तोड़फोड़ औ हर तरह कय निसान मिटावइ कय कोसिस कीन जात अहै।”
16 मई का चलाए गए तोड़फोड़ अभियान मा हावड़ा इस्टेशन इलाका मा नगर निगम कय अधिकारियन द्वारा अवैध कब्जा कय रूप मा चिन्हित ढांचा का निशाना बनावा गा। इ काररवाई कय बाद तृणमूल कांग्रेस विरोध प्रदर्शन सुरू कइ दिहिस औ पच्छिम बंगाल मा नई बनी भाजपा सरकार पर “बुलडोजर संस्कृति” का बढ़ावा देवइ औ फेरीवाला अउर रहइ वालन का जबरदस्ती खदेड़इ कय आरोप लगाइस।
यहिसे पहिले टीएमसी नेता पच्छिम बंगाल विधानसभा कय बाहर प्रदर्शन कीन औ खदेड़े कय अभियान कय खिलाफ कोलकाता औ आस-पास कय इलाकन मा बड़के पैमाने पर विरोध प्रदर्शन कय एलान कीन। भाजपा सरकार कय कहब अहै कि ई तोड़फोड़ अभियान भीड़-भाड़ वाले रेलवे इस्टेशन इलाका कय आस-पास कय अवैध कब्जियन का हटावइ औ सरकारी बुनियादी ढांचा मा सुधार करइ कय मकसद से चलावा गा रहा।
