रूस एक बार फेर यूक्रेन पर भारी हमला कीन है। कुछ घंटा पहिलेई यूक्रेन के राष्ट्रपति वोलोदिमीर जेलेंस्की हमला होवे के चेतावनी दीन रहें। रूस रात भर यूक्रेन के कई शहरन क निशाना बनायस। सीमा पार ड्रोन हमला के जवन सिलसिला चलत है, ई ओकर सबसे ताजा घटना है। बताइ दीं कि रूस अउर यूक्रेन के बीच चार साल से जादा समय से चलत ई जंग में दुनों तरफ से हमला जारी है।
कत्तई नुकसान भवा?
रॉयटर्स के मुताविक, निप्रो में पांच लोगन के मौत के खबर है अउर ढेर जवन लोगन घायल भयं हैं। कीव में कम से कम चार लोग मारे गय हैं अउर 51 लोग घायल भयं हैं। बीबीसी के हवाला से कीव के मेयर विटाली क्लित्स्को पुष्टि कीन कि दुई ऊंच अपार्टमेंट बिल्डिंग पर हमला भवा है अउर डर ई है कि कइयौ लोग अभी मलबे के नीचे फंसा होइ सकत हैं। कीव शहर के सैन्य प्रशासन के प्रमुख तैमूर तकाचेंको टेलीग्राम पर लिखेन कि, सुरुवाती खबर से पता चलत है कि मलबे के नीचे लोग फंसे भयं हैं। दक्षिण-पूर्वी शहर जापोरिजिया में एक औद्योगिक यूनिट पर भी हमला भवा।
कुर्स्क इलाके में यूक्रेनी ड्रोन हमला में एक नागरिक के मौत
एएफपी के एक रिपोर्ट के मुताविक, यूक्रेन के सीमा के लगे रूस के कुर्स्क इलाके में एक यूक्रेनी ड्रोन हमला में एक आदमी के मौत भइ है। कुर्स्क इलाके के गवर्नर अलेक्जेंडर खिन्श्टीन टेलीग्राम पर लिखेन, आज रिल्स्की जिला के श्चेकिनो गांव में एक दुश्मन ड्रोन एक आम नागरिक के गाड़ी पर हमला कीन। हमका बहुत दुख के साथ बतावे पड़त है कि एक आम नागरिक के जान चली गइ है।
मौत के बढ़ती संख्या के बावजूद शांति के कोशिश ठप
यूक्रेन में युद्ध चार साल से जादा समय से चलत है। रूस फरवरी 2022 में हमला सुरु कीन रहा। दुनों देश बुनियादी ढांचा, सैन्य ठिकाना अउर कबहूँ-कबहूँ आम नागरिकन के इलाका क निशाना बनावे खातिर ड्रोन पर जादा निर्भर होत जात हैं। ई झगड़ा क खतम करे के कोसिस अभी ठप पड़ी है। दुनों तरफ से मरत लोगन के बढ़ती संख्या के बावजूद बातचीत पूरी तरह से रुक गइ है अउर युद्ध-विराम के कवनो रास्ता नजर नाई आवत है।
