राष्ट्रीय जांच एजेंसी (एनआईए) मंगलार (9 जून) कय पंजाब अउर हरियाणा मा कइयौ ठिकानन पय तलाशी अभियान चलाइ। इ तलाशी अभियान पाकिस्तान मा बैठय वाला आतंकी शहजाद भट्टी सय जुड़य तीन आतंकी गिरोहन् कै मामला मा कीन गवा। आतंकवाद विरोधी एजेंसी कै टीम दुनों राज्यन कय नौ जिला मा स्थित 18 ठिकानन पय एक साथ तलाशी लीहिन अउर जानकारी जुटाय खतिव कइयौ मनइन सय पूछताछ कीन।
एनआईए डिजिटल उपकरण अउर दस्तावेज़ ज़ब्त कीन
तलाशी कै दौरान, एनआईए कै टीम ढेर सार डिजिटल उपकरण अउर दस्तावेज़ ज़ब्त कइ लीहिन, साथ ही अलग-अलग संचार नेटवर्क, रुपय-पइसै कै लेन-देन अउर तीनउ मामला मा एजेंसी कै निगरानी मा आय मनइन कै गतिविधि सय जुड़ी जानकारी भी मिलि। एजेंसी एक बयान मा बताई कि तलाशी मा जुटाई गई सब जानकारी अउर सबूतन् कय गहन जांच अउर फोरेंसिक अउर तकनीकी टेस्ट खतिव भेजा गवा है, ताकि सीमा पार कै बड़ी साजिश कय खुलासा होइ सकै।
एनआईए कै चलत जांच कै तहत कुछ मनइन कय आगे कय पूछताछ खतिव नोटिस जारी भवा है। इ जांच सीमा पार सय गैंगस्टर सय आतंकी बनय वाला भट्टी कै चलावत नेटवर्क कै पाछे कै बड़ी साजिश कय पर्दाफाश करय खतिव कीन जात अहै। बयान मा कहा गवा, “आज कै तलाशी भट्टी कै साथी अउर तीनउ मामला सय जुड़य आतंकी साजिश मा शामिल दूसर मनइन कय पहचान करय पय केंद्रित रहा।”
एनआईए कै जांच मा का खुलासा भवा?
एनआईए कै अब तक कै जांच मा पंजाब कै जालंधर मा सोशल मीडिया इन्फ्लुएंसर रोजर संधू कै घर पय मार्च 2025 मा भवा ग्रेनेड हमला कै संबंध शहजाद भट्टी सय जुड़य पाय गवा है। अप्रैल 2026 मा, एनआईए भट्टी कय फरार घोषित करत अउर इ मामला मा एक दूसर आरोपी कै खिलाफ आरोपपत्र दायर कीन रहा। एनआईए कय इहो पता चला है कि भट्टी हरियाणा कै सिरसा स्थित महिला पुलिस स्टेशन मा नवंबर 2025 मा भवा विस्फोट अउर हरियाणा कै अंबाला स्थित बलदेव नगर पुलिस स्टेशन मा जनवरी 2026 मा भवा विस्फोट कै भी साजिश रची रहा। सिरसा मामला मा, एनआईए मई 2026 मा भट्टी अउर पाकिस्तान मा बैठय वाला एक दूसर हैंडलर सोहेल अहमद उर्फ सोहेल बलूच समेत नौ मनइन कै खिलाफ आरोपपत्र दायर कीन रहा।
