अमेरिका मां न्यायालय कय आदेश कय पालन मां सनिच्चर कय भोर मां ‘जॉन एफ केनेडी मेमोरियल सेंटर ऑफ परफार्मिंग आर्ट’ से राष्ट्रपति डोनल्ड ट्रंप कय नाम हटावा गवा। सेंटर कय ट्रंप कय नाम दियै छः महीना से भी कम समय भवा रहा, तभी ओकरे बिरोध मां आय न्यायालय कय आदेश कय पालन भवा है। न्यायालय साफ-साफ कहि दिहिस कि संस्थान कय नाम बदले कय अधिकार खाली कांग्रेस (अमेरिकी संसद) कय अहै, कउनो ट्रस्ट कय नाहीं। जानि लेईं कि दिसंबर 2025 मां राष्ट्रपति ट्रंप कय अध्यक्षता वाले ट्रस्ट नाम बदले कय फैसला लइ लिहिस रहा अव ओका ट्रंप कय नाम कय दिहिस रहा।
केनेडी सेंटर से हटावा गवा ट्रंप कय नाम
न्यायालय कय आदेश मां अमेरिकी सरकार कय केनेडी सेंटर कय नाम सुकूर (शुक्रवार) कय ही पुरान स्थिति मां लइ आवै कय रहा, पै ऊ अइसन करि नाहीं पाई। ओकरे बाद सनिच्चर कय रात एक बजै बीस मिनट पर संस्थान कय मुख्य दुआर, दीवारन अव वेबसाइट आदि से नाम हटावै कय काम सुरु भवा अव घाम निकरै से पहिले ई काम पूरा कइ लीन्ह गवा। सरकार कय न्याय बिभाग कहिस है कि मौसम खराब होवै कय नाते नाम हटावै कय काम सुकूर कय नाहीं होइ सका, पै सनिच्चर कय घाम निकरै से पहिले ई पूरा कइ लीन्ह गवा।
डेमोक्रेटिक पार्टी कय प्रत्याशी कय रूप मां चुनाव जीति कय राष्ट्रपति बने जॉन एफ केनेडी कय 1963 मां गोली मारि कय हत्या कइ दीन्हि गई रही। जॉन एफ केनेडी कय याद मां बना केनेडी सेंटर, ओकरे बाद ओनकय याद मां वॉशिंगटन मां संस्थान कय स्थापना करै कय फैसला लीन्ह गवा अव 1971 मां केनेडी सेंटर कय आम जनता खतिर खोलि दीन्ह गवा। इ सेंटर कय संचालन एक ट्रस्ट करत है।
जनवरी 2025 मां राष्ट्रपति बनै कय बाद रिपब्लिकन पार्टी कय ट्रंप इ ट्रस्ट से पुरान लोगन कय हटाय कय अपने बिस्वासपात्रन कय नियुक्त करिन। ओकरे बाद राष्ट्रपति कय रूप मां ट्रस्ट कय अध्यक्ष कय पद सम्हारिन। दिसंबर 2025 मां भई ट्रस्ट कय बैठक मां सेंटर कय नाम ट्रंप कय नाम पर करै कय प्रस्ताव पास भवा अव ओका लागू कइ दीन्ह गवा। ओकरे बाद ओहायो से डेमोक्रेटिक पार्टी कय सांसद जायस बेट्टी ट्रस्ट कय फैसला कय न्यायालय मां चुनौती दिहिन। सुनवाई कय बाद न्यायालय ट्रस्ट कय फैसला कय अवैध बतावा अव सेंटर से ट्रंप कय नाम हटावै कय आदेश दिहिस।
