अमेरिकी राष्ट्रपति डोनल्ड ट्रंप न्यू मेक्सिको कै नाम बदलकर न्यू अमेरिका करै कै सलाह दीहिन अहै। इहि कै लेकर अब सोशल मीडिया पर चर्चा तेज होइ गवा अहै।
ट्रंप सोमवार कै ‘ट्रुथ सोशल’ पर लिखिन, “न्यू मेक्सिको तुरन्त अपना नाम बदलकर न्यू अमेरिका कर लेवचाहिए। हम मैक्सिको नाहीं अहैं, हम यूनाइटेड स्टेट्स ऑफ अमेरिका (संयुक्त राज्य अमेरिका) अहैं।”
न्यू मेक्सिको कै नाम बदलै से का होइ? ट्रंप दावा करिन, न्यू मेक्सिको कै नाम न्यू अमेरिका करै से राज्य कै अहमियत औ प्रतिष्ठा बढ़ी। अमेरिकी झंडा कै सलामी देवत बेला इहाँ कै रहनिहारन कै गर्व अउर बढ़ी। साथे-साथ इहो सुनिश्चित होई कि न्यू मैक्सिको जौन बेईमान चुनाव (crooked elections) कै नाते जाना जात अहै, उ फेर से ईमानदार होइ जाइहीं।
ट्रंप सबसे पहिले ‘गल्फ ऑफ मेक्सिको’ (मैक्सिको की खाड़ी) कै नाम बदलकर ‘गल्फ ऑफ अमेरिका’ (अमेरिका की खाड़ी) कर दीहिन। फेर उ चाहत रहिन कि ‘लेक ओंटारियो’ कै ‘लेक अमेरिका’ कहा जाइ। अब उ चाहत अहैं कि न्यू मेक्सिको कै नाम बदलकर न्यू अमेरिका कर दीहा जाइ।
ट्रंप कै इ बात कै लेकर सोशल मीडिया पर एक मजाकू चलि रहा अहै कि ट्रंप शायद जल्दिये पूरा अमेरिका कै नामहि बदल दें, शायद एकर नाम ‘न्यू इंडिया’ (नया भारत) रख दें। काहेकि क्रिस्टोफर कोलंबस, जौन अमेरिका कै रस्ता खोजि लिहिन, असल मां त उ भारतिए कै खोज मां निकरे रहिन।
का सच में बदल जाइ न्यू मेक्सिको कै नाम?
ट्रंप कै बातन कै न्यू मेक्सिको कै राजनीतिक प्रतिनिधियों पर कोउ असर नाहीं परा। डेमोक्रेट सीनेटर बेन रे लुजान ट्रंप कै याद डिलाइन कि इ राज्य कै नाम सदियन पुरान अहै, जौन अमेरिका (संयुक्त राज्य अमेरिका) कै अस्तित्व मां आवै से बहुत पहिले से अहै।
डेमोक्रेट सीनेटर पलटवार करत हुइ बोलिन, “हम न्यू मेक्सिकन अहैं। हमार अपने नाम पर गर्व अहै, अपने घर पर गर्व अहै औ हम इन दुनू कै बनाए रहब। डोनल्ड ट्रंप कै पद से हटै कै बहुत समय बाद भी, हम न्यू मेक्सिको ही बने रहब।”
ट्रंप कै इ धमकी कै कुछ लोगन खलि ट्रोलिंग मानि रहिंड, पर इ एक संवैधानिक रुकावट भी अहै। राज्य कै नाम तय करै कै अधिकार राज्य कै संविधान कै पास अहै औ राष्ट्रपति कै सोशल मीडिया पोस्ट से इ बदला नाहीं जाइ सकत।
सीनेटर बर्नी सैंडर्स ट्रंप कै कड़े सब्दुन मां जवाब देत हुइ लिखिन, “नाहीं, मिस्टर ट्रंप। अमेरिकी लोग नाहीं चाहत कि त्ूँ न्यू मैक्सिको कै नाम बदला। उ चाहत अहैं कि त्ूँ तुरन्त अपना वह अवैध ईरान जुद्ध खतम करा, जेकर मारे अमेरिकियन कै पेट्रोल खर्तिन 4.30 डॉलर प्रति गैलन औ डीजल खर्तिन 6.30 डॉलर प्रति गैलन चुकाव लागिक अहै। बस बहुत भवा।”
