ब्रिटेन मां भारतीय मूल के एक मनई का अपहरण, टॉर्चर अउर रेप कय अपराध मा दोषी पावा जाय के बाद सुकवार का 34 साल कय जेल कय सजा सुनाई गवा। आइलवर्थ क्राउन कोर्ट मां चली सुनवाई के बाद 34 साल के गगनदीप सिंह का फरवरी महीना मां रेप के दुई मामला, गैर-कानूनी ढंग से बंधक बनाय, इरादतन गंभीर चोट पहुंचाव अउर अपहरण कय दोषी पावा गवा रहा।
ओका पैरोल भी ना मिली अउर ओका पूरा 34 साल कय सजा काटय परी, जवने मां 28 साल जेल मां बिताय पड़ि अउर ओकरे बाद कड़ी पाबंदी के साथ छह साल कय बढ़ी हुई लाइसेंस अवधि होई। जब तक वह कम से कम 18 साल या जेल कय सजा कय दुई-तिहाई हिस्सा पूरा ना कर लेइ, तब तक ओका पैरोल देय पर कउनो विचार ना कीन जाई।
का अहै मामला?
सुनवाई के दौरान बतावा गवा कि 24 साल कय पीड़ित मेहरारू का पच्छिम लंदन के हैनवेल मा एक घर लइ आवा गवा रहा, जहां ओकर बहुत लंबा समय तक प्रताड़ना भवा। जांच की अगुवाई करे वाली मेट्रोपॉलिटन पुलिस की नॉर्थ वेस्ट रेप एंड सीरियस सेक्सुअल ऑफेंस यूनिट की डिटेक्टिव कॉन्स्टेबल सीतारा अब्दुल कहिन, “इ मामला मा पीड़ित जवने क्रूरता कय सामना करिस, ओकर कल्पना भी ना कीन जाइ सकत।”
उनका कहब रहा, “आगे आवे अउर हमलावर का सजा दिलवाय मां हमार मदद कय के ऊ बहुत हिम्मत देखाइस है। ओकरे ऊपर जवने बेरहमी से नियंत्रण राखा गवा रहा, ओसे ओका आपन जान कय डर सताय लाग रहा।”
कोर्ट का बतावा गवा कि मेहरारू का तब शक भवा जब जून 2024 मा ओसे थाईलैंड से यूके तक एक सूटकेस ले आवय का कहा गवा, जवने मां अनजान चीज रही। ऊ मना कय दिहिस, लेकिन जब ऊ बर्मिंघम एयरपोर्ट पहुँची तौ ओका एक कार मां बइठाय के नकाबपोश मनई लंदन लइ गए, जहां सिंह दुई बार ओकर रेप करिस।
चुप रहय कय दिहिन धमकी
मेट पुलिस बताइस कि ऊ इ अनुभव से सदमा मां रही अउर सुरुआत मां पुलिस का पूरा सच बताव मा हिचकिचात रही। डीसी अब्दुल कहिन, “ओका चुप करावय कय कोसिस मां धमकी दीन गई, लेकिन ओकर महतारी कय सहयोग अउर ओकर मामला कय जांच करत अधिकारी के लगन अउर मेहनत कय वजह से हम एक बहुत खतरनाक मनई का पकड़य अउर ओकरे ऊपर आरोप तय करय मां कामयाब भये।”
