मौसम विभाग चेतावनी जारी करे अहै। राजधानी दिल्ली-एनसीआर समेत उत्तर भारत क कइयौ राज्यन मा आवै वाले दिनन मा भीषण गरमी मनइन क मुश्किलें बढ़ावै वाली अहै। IMD कहे अहै कि 22 मई तक दिल्ली, हरियाणा, पंजाब, राजस्थान, उत्तर प्रदेश अउर मध्य प्रदेश समेत कइयौ राज्यन मा लू से लैके गंभीर हीटवेव क स्थिति बनी रही।
दिल्ली-NCR मा 45 डिग्री तक पहुँच सकत है तापमान
मौसम विभाग क मुताबिक, दिल्ली-एनसीआर मा अगिले तीन दिनन क दौरान तापमान मा 2 से 3 डिग्री सेल्सियस तक बढ़ोत्तरी होइ सकत है। इतवार क अधिकतम तापमान 44 डिग्री सेल्सियस क आस-पास रहै क अनुमान अहै। एकरे बाद आसमान साफ रहै से भीषण गरमी बढ़ी अउर पारा 45 डिग्री सेल्सियस तक पहुँच सकत है। रात क समय गरम हवा चल सकत हैं। तापमान अउर बढ़ सकत है अउर राहत मिलै क संभावना कम अहै।
आखिर का होत अहै हीटवेव?
मौसम विभाग क अनुसार, मैदानी इलाकन मा जब अधिकतम तापमान 40 डिग्री सेल्सियस या ओसे ज्यादा होइ सकत है अउर सामान्य से 4.5 डिग्री सेल्सियस या ओसे ज्यादा ऊपर चली जाय, त ओका हीटवेव माना जात अहै। जउं पारा 45 डिग्री सेल्सियस या ओसे ज्यादा होइ जाय, त ओका सीधे तौर पर लू क स्थिति माना जात अहै, चाहे सामान्य तापमान से अंतर केतना भी होय।
सेहत पर पड़ सकत है गंभीर असर
तेज गरमी अउर लू क वजह से डिहाइड्रेशन, हीट एग्जॉशन अउर हीट स्ट्रोक जैसी समस्याएं होइ सकत हैं। ई दौरान छोट लरिका, बुजुर्गन अउर बाहरे काम करै वाले मनइन का खास सावधानी बरतै क सलाह दीन गयी अहै।
गरमी से बचै खतिर अपनाव ई उपाय
– लू से बचै खतिर सबसे जरूरी अहै कि दुपहरी 12 बजे से साँझ 4 बजे तक घाम मा न निकरौ।
– नीक नीक पानी पीत रहौ।
– हल्का रंग अउर सूती कपड़ा पहिनौ।
– बाहरे निकरै से पहिले टोपी, छाता या गमछा क इस्तेमाल जरूर करौ।
– लरिकन अउर बुजुर्गन क खास ख्याल रखौ।
राहत मिलै क कौनों चांस नाहीं
IMD अलर्ट करे अहै कि फिलहाल यूपी अउर मध्य भारत क ज्यादातर हिस्सन मा तापमान लगातार बढ़त अहै। अगिले कुछ दिनन तक गरमी से राहत मिलब काफी मुश्किल अहै। येकरे तईं आपन सेहत क ध्यान रखौ।
