भारतीय विदेश मंत्रालय कय हफ्तावारी प्रेस ब्रीफिंग मा प्रवक्ता रणधीर जायसवाल आज तरह-तरह कय अंतरराष्ट्रीय अउर क्षेत्रीय मुद्दा पर पूछे गए सवालन कय जवाब दीन। एही बीच पाकिस्तान अधिकृत कश्मीर मा भई हिंसा, बांग्लादेश कय साथ सीमा पर बातचीत, ओमान तट कय लगे फँसे भारतीय नाविकन कय बचाव अभियान, पच्छिम एशिया कय हालत अउर भारत मा अवैध रूप से रहत विदेशी नागरिकन कय मुद्दा खास तौर से चर्चा मा रहा।
पाकिस्तान अधिकृत कश्मीर मा पुलिस अउर प्रदर्शन करइ वालन कय बीच भई हिंसक झड़प कय लेके भारत पाकिस्तान कय खूब खरी-खोटी सुनवाइ। प्रवक्ता रणधीर जायसवाल कहिन कि पाकिस्तान लगातार झूठी खबर अउर भ्रामक वीडियो फैलाइके अपनी अंदरूनी विफलता अउर मानवाधिकार कय उल्लंघन से दुनिया कय ध्यान भटकावै कय कोसिस कर रहा है। उ कहिन कि पाकिस्तान अधिकृत कश्मीर मा पुलिस कय भारी बर्बरता कय खबर सामने आई अहै, जेहिमा कइयौ लोगन कय मौत भई अहै अउर ढेर संख्या मा लोग घायल भये हैं। भारत उम्मीद जतावा है कि अंतरराष्ट्रीय समुदाय पाकिस्तान कय ओकर काम अउर मानवाधिकार हनन कय खातिर जवाबदेह ठहराई।
हम आपकय बताइ देईं कि पाकिस्तान अधिकृत कश्मीर मा आज प्रस्तावित बंद अउर प्रदर्शन कय पहिले हालत हिंसक होइ गवा। हुवाँ प्रतिबंधित संगठन संयुक्त आवामी एक्शन कमेटी कय समर्थकन अउर सुरक्षा बल कय बीच झड़प मा ग्यारह लोगन कय मौत होइ गई अउर लगभग सत्तर लोग घायल भये हैं। ई प्रदर्शन क्षेत्रीय विधानसभा चुनाव मा बारह आरक्षित सीट कय विरोध मा होइ रहा रहा। प्रदर्शनकारी ई सीट कय खतम करै कय मांग कर रहे हैं काहे से एपे अइसन उम्मीदवार चुनाव लड़त हैं जवन कश्मीर मा नाहीं, बल्कि पाकिस्तान कय दूसर हिस्सा मा रहत हैं।
पुलिस अधिकारीन कय मुताबिक, प्रदर्शनकारी एक अस्पताल कय मुर्दाघर कय बाहर जमा भये रहे, जहवां पुलिस गोलीबारी मा मारे गए एक कार्यकर्ता कय शव राखा रहा। पूंछ क्षेत्र कय आयुक्त सरदार वहीद खान बताइन कि प्रदर्शनकारी कय गोलीबारी मा चार पुलिसकर्मी अउर एक राहगीर कय मौत भई, जबकि जवाबी कार्रवाई मा छह प्रदर्शनकारी मारै गए। पुलिस प्रमुख लियाकत मलिक कहिन कि घटना मा तेईस सुरक्षाकर्मी अउर पचास प्रदर्शनकारी घायल भये हैं अउर तीस लोगन कय गिरफ्तार कइ लीन गवा अहै।
उधर, संयुक्त आवामी एक्शन कमेटी कय नेता शौकत नवाज मीर रावलकोट मा लोगन कय नरसंहार कय आरोप लगाइके बंद जारी रखै कय बात कहिन है। हालाँकि प्रशासन ई आरोप कय खारिज कइत भये कहिस कि कानून-व्यवस्था बहाल करै खातिर कार्रवाई भई रही। अधिकारीन कय दावा अहै कि प्रदर्शनकारी स्वचालित हथियार, पेट्रोल बम अउर दूसर हथियार कय इस्तेमाल करिन। हम आपकय बताइ देईं कि क्षेत्रीय सरकार शुक्रवार कय ई संगठन कय आतंकवाद निरोधक कानून कय तहत प्रतिबंधित घोषित कइ दिहिन रहा अउर पर्यटकन कय नौ जून कय पहिले क्षेत्र छोड़ै कय सलाह दिहिन रहा।
एकरे अलावा, विदेश मंत्रालय कय ब्रीफिंग मा भारत अउर बांग्लादेश कय बीच जारी सीमा सुरक्षा वार्ता कय भी जिक्र भवा। प्रवक्ता रणधीर जायसवाल कहिन कि सीमा सुरक्षा बल अउर बांग्लादेश सीमा रक्षक बल कय महानिदेशक स्तर कय बैठक चलत अहै, जेहिमा दुनों देशन कय बीच तरह-तरह कय अहम मुद्दा पर चर्चा होइ रही अहै। साथ ही ओमान तट कय लगे फँसे जहाज एमटी मेरीवेक्स कय बारे मा जानकारी देत भये उ बताइन कि ई जहाज ओमान कय तट कय लगे खराब होइ गवा रहा। एपे 24 भारतीय चालक दल कय सदस्य सवार रहे। भारतीय दूतावास ओमान प्रशासन से संपर्क कइके बचाव अभियान चलवावा, जेकर बाद सब भारतीय नागरिकन कय सुरक्षित बचा लीन गवा। भारत ई अभियान मा सहयोग कय खातिर ओमान सरकार कय आभार भी जतवावा।
एकरे अलावा, पच्छिम एशिया मा बढ़त तनाव पर भारत चिंता जतवत भये कहिस कि क्षेत्र मा शांति बहाली खातिर तनाव कम करब, बातचीत अउर कूटनीति ही सबसे असरदार रास्ता अहै। रणधीर जायसवाल कहिन कि भारत लगातार शांति अउर स्थिरता कय जरूरत पर जोर देत रहा अहै। एकरे अलावा भारत मा अवैध रूप से रहत विदेशी नागरिकन कय मुद्दा पर उ साफ कहिन कि अगर कवनो विदेशी नागरिक अवैध रूप से भारत मा रहत अहै त ओकर खिलाफ कार्रवाई भारतीय कानून कय हिसाब से कीन जाई।
एकरे अलावा, विदेश मामला से जुड़ी एक अउर बड़ी खबर ई रही कि पच्छिम एशिया मा जारी तनाव कय बीच प्रधानमंत्री नरेंद्र मोदी आज कुवैत कय अमीर शेख मिशाल अल अहमद अल जाबेर अल सबाह से बातचीत करिन। दुनों नेता क्षेत्र कय मौजूदा सुरक्षा हालत अउर ताजा घटनाक्रम पर विस्तार से चर्चा करिन। प्रधानमंत्री मोदी कुवैत कय संप्रभुता अउर क्षेत्रीय अखंडता कय प्रति भारत कय मजबूत समर्थन कय दोहरावत भये कुवैत पर भये हमला कय कड़ी निंदा करिन। उ पच्छिम एशिया मा बढ़त तनाव पर गहरी चिंता जतवत भये कहिन कि शांति अउर स्थिरता कय जल्दी बहाली खातिर तनाव कम करब, बातचीत अउर कूटनीति ही सबसे सही रास्ता अहै। प्रधानमंत्री कुवैत मा रहत भारतीय समुदाय कय सुरक्षा अउर भलाई खातिर अमीर कय द्वारा दीन जाइ रहे व्यक्तिगत ध्यान खातिर उनकर आभार भी जतवावा।
प्रधानमंत्री मोदी अउर कुवैत कय अमीर कय बीच ई बातचीत अइसन समय भई अहै जब पच्छिम एशिया मा अनिश्चितता बढ़ी अहै अउर अमेरिका तथा ईरान कय बीच संभावित समझौता कय लेके भी चर्चा तेज अहै।
