दलन की खेती-पाती का बढ़ावा दये से उपज मा नीक बढ़ती भई है, जेहिसे बफर स्टॉक भी मजबूत होइ गवा है। मुला सरकार के दखल के बादौ ज्यादातर दलन के दाम MSP से नीचे बना अहै। रिपोर्टन के मानि तौ बाजार मा दलन के आवक ढेर होय अउर मांग मा कमी के कारन दाम गिर गए अहैं। आंकड़ा बतावत हैं कि तुअर, चना, उड़द, मसूर अउर मूंग जइसन दलन के बाजार रेट MSP से 4 से 14 फीसदी तक नीचे अहै।
MSP से काफी नीचे गिर गवा दलन के भाव
दाल के कुल उपज मा लगभग 50 फीसदी हिस्सा चने क होत है, अउर अइबे मंडी मा एकर दाम 5200 रुपिया प्रति क्विंटल अहै, जबकि ई सीजन बरे सरकार न्यूनतम समर्थन मूल्य (MSP) 5875 रुपिया प्रति क्विंटल तय करे रही। वहीँ तुअर के दाम तय कीमत से लगभग 6 फीसदी नीचे अहै। मसूर 6200 रुपिया प्रति क्विंटल अउर उड़द के दाम 7500 रुपिया प्रति क्विंटल तय अहै, मुला ई दालि भी MSP से क्रमशः 11 प्रतिशत अउर 4 प्रतिशत कम मा बिकात हैं।
सरकारी एजेंसिन के पास मौजूद बफर स्टॉक
उपभोक्ता मामला विभाग के मुताबिक, बाजार मा दलन के दाम काबू मा रखे बरे सरकार दलन क एक बड़ा बफर स्टॉक तैयार करे है। फिलहाल ई समय सरकारी एजेंसी NAFED अउर NCCF के पास 26.9 लाख टन दालि धरी अहै। एमा 11 लाख टन चना, 7.5 लाख टन तुअर, 3.6 लाख टन मसूर, 4 लाख टन मूंग अउर 33,402 टन उड़द सामिल अहै।
सरकार राज्यन से करे रही ई मांग
राज्यन का भेजे गए एक चिट्ठी मा, उपभोक्ता मामला विभाग कहे रहा कि ऊ आपन जनता बरे चलाई जा रही कल्याणकारी योजना जइसन पीएम-पोषण, आईसीडीएस अउर सार्वजनिक वितरण प्रणाली बरे दालि खुले बाजार से न खरीदइ बल्कि केंद्रीय भंडार से लेइँ। सरकार के मुताबिक, एहिसे राज्यन का लंबी टेंडर (निविदा) प्रक्रिया से छुटकारा मिली अउर केंद्रीय स्टॉक क सही इस्तमाल होइ सकी।
मानसून से तय होइ दलन क भाव
दलन के ब्यापार मा नामी कंपनी मयूर ग्लोबल कॉर्पोरेशन के मुखिया हर्षा राय फाइनेंशियल एक्सप्रेस का बताइन कि दाम मा ई कमी थोड़े समय बरे अहै। एमा बराबर बदलाव देखइ का मिलत रहत है। जब आवक कम होइ जाई तौ दाम मा सुधार होइ। एकरे अलावा जानकारन बताइन कि गरमी के महीना मा दलन के मांग सुस्त रहत है, अउर आगे चलिके दाम कइसन रही, ई मानसून के प्रदर्शन पर निर्भर करी।
