भारतीय टीम कय पुरान कोच रवि शास्त्री सालां बाद ओय बात कय कबूल कइ लिहिन हय जवन लगातार विराट कोहली कय बारे मा होत रहत रही। शास्त्री जब टीम इंडिया कय कोच रहें तब विराट टीम कय कप्तान रहें। दुनो जने मा खूब बनत रही अउर टीम कय या दौरान सफलता भी मिलत रही।
विराट कोहली मैदान पै खूब आक्रामक रहत रहें अउर हर कवनो से भिड़ि जात रहें। उनकय बारे मा कहल जात रहा कि ऊ घमंडी अहैं। शास्त्री अब या बात पै आपन चुप्पी तोरि दिहिन अउर कहिन हय कि या सच अहै, पै सिर्फ मैदान तक।
मैदान कय बाहर अलग इंसान
शास्त्री कहिन कि कोहली मैदान कय बाहर एकदम अलग इंसान अहैं अउर उनकर मैच कय बाद आपन कय बदलै कय शानदार काबिलियत अहै। शास्त्री ‘वन8’ चैनल पै बात करत कहिन, “घमंडी, बिगड़ा भवा साहिबजादा, या कतहूं न कतहूं सही होइ सकत हय, पै सिर्फ मैदान पै। मैदान कय बाहर एकर ठीक उल्टा। मयका ओय लोग पसंद अहैं जवन या तरे से ‘स्वीच ऑन’ होत अहैं अउर फेर ‘स्वीच ऑफ’ होइ जात अहैं।”
चोट से परेशान अहैं कोहली
कोहली इस समय अफगानिस्तान कय खिलाफ खेलि जाइ रही तीन मैच कय वनडे सीरीज मा टीम इंडिया कय हिस्सा नाहीं अहैं। ऊ मांसपेशी मा चोट कय कारन टीम से बाहर अहैं। या चोट उनका आईपीएल-2026 कय फाइनल कय दौरान लागि रही। कोहली आपन टीम आरसीबी कय जीत दिहिन रही जवन या टीम कय लगातार दूसरा खिताब अहै। कोहली कय नजर अब अगिला साल होय वारी वनडे वर्ल्ड कप पै टिकी अहै। कोहली कय वर्ल्ड कप खेलै पै संदेह जतावा जात हय, पै ऊ जवन तरे कय फॉर्म मा अहैं, ओका देखत हुवय उनका बाहर करब आसान नाहीं होइ।
