WHO हंटावायरस का लेके दिहिस राहत भरी खबर, डराइ के बात नाहीं

बिस्व स्वास्थ संगठन (WHO) अटलांटिक महासागर मा एक क्रूज जहाज पर फइले हंटावायरस के संक्रमण का लेके मनई का धीर धरावइहें। संगठन कहिस है कि अभी ई वायरस के फइलाव सीमित रहइ के उम्मीद है, बाकी आवइ वाले दिनन मा कुछ अउर मामले सामने आइ सकत हैं।

WHO के इमरजेंसी अलर्ट अउर रिस्पॉन्स डायरेक्टर अब्दी रहमान महमूद बियफ के दिन कहें कि अगर सब देस सरकारी सेहत के उपायन का लागू करइँ अउर सहयोग बनाय राखइँ, त ई बीमारी के फइलाव सीमित रही। बाकी WHO ई चेतावनी भी दिहिस है कि कुछ अउर संक्रमण के मामले आवइ के संभावना से इनकार नहीं कीन जाइ सकत।

ई कोविड जइसन महामारी नाहीं आय

WHO मा महामारी की तैयारी अउर बचाव की डायरेक्टर मारिया वैन केरखोव साफ कहिन कि आज के हालात का कोविड-19 जइसन महामारी से जोड़ के न देखा जाय। ई कउनो महामारी की शुरुआत नाहीं आय। ई कोविड नाहीं आय। WHO बतायस कि उ पांच देसन के लैब मा हंटावायरस के जांच बदे 2,500 डायग्नोस्टिक किट भेजिस है, ताकि संक्रमण की पहचान अउर निगरानी जल्दी से कीन जाय सकइ।

जहाज से उतर गए रहें दर्जनों यात्री

जहाज चलावइ वाले अउर डच अधिकारियन बियफ का बताईन कि खतरनाक हंटावायरस से जुझत एक क्रूज जहाज से दर्जनों यात्री 24 अप्रैल का बिना कउनो संपर्क जांच (कॉन्टैक्ट ट्रेसिंग) के जहाज छोड़ दिहिन। ई घटना जहाज पर पहिले यात्री की मौत के लगभग दुई हफ्ता बाद भई रही।

कंपनी पहिले कहे रही कि 11 अप्रैल का मरे डच मनई के लास दूर दक्खिन अटलांटिक दीप ‘सेंट हेलेना’ पर जहाज से उतारी गई रही, जहाँ उनकी मेहरारू भी उतरी रहीं। ओकरे बाद उ दक्खिन अफ्रीका बदे रवाना भई अउर वहीं उनकी मौत होइ गई।

कंपनी बियफ का कहिस कि 29 यात्री जहाज छोड़े रहें, जबकि डच बिदेस मंत्रालय ई गिनती लगभग 40 बतायस है। कंपनी पहिले ई बात नहीं मानी रही कि उ समइ अउर भी दर्जनों लोग जहाज से उतरे रहें। ओशनवाइड एक्सपेडिशन्स कहिस कि अपने-अपने देस लौटइ वाले मनई 12 अलग-अलग देसन के रहें। दुई मनई अइसन भी रहें जेकर देस के बारे मा पता नहीं रहा।

दक्खिन अफ्रीका अउर यूरोप के अधिकारी जहाज से उतरे सबय यात्रिन के संपर्क के पता लगावइ के कोसिस करत अहैं। बुद्ध के दिन ई जानकारी सामने आई कि सेंट हेलेना मा जहाज से उतरइ अउर वापस घर जाइ के बाद स्विट्जरलैंड मा एक मनई मा हंटावायरस संक्रमण के पुष्टि भई है, हालांकि ओकर ठीक-ठीक जानकारी अभी साफ नाहीं है। डच अधिकारियन ई बात साफ नाहीं कीन है कि जहाज से उतरे बाकी यात्री अब कहाँ अहैं।