यूपी-बिहार समेत कई राज्यन मा बरखा अउर आंधी क अलर्ट, मौसम बिभाग जारी कीन चेतावनी

दक्खिन-पच्छिम मानसून के विदा होइ से ठीक पहिले कई राज्यन मा मानसूनी हलचल एक बार फिर से पूरी तरे तेज होइ गय है। भारत मौसम बिज्ञान बिभाग देस के 24 राज्यन मा बरखा के संभावना जताइस है। इनमा से 18 से जादा राज्यन मा भारी बरखा, गाज गिरै अउर तेज तूफानी हवान का लेके मौसम बिभाग अलर्ट जारी करे है।

समुंदर किनारे अउर पच्छिमी इलाकन मा मौसम क सबसे जादा असर देखै का मिल सकत है, जहां गुजरात मा 50 किलोमीटर प्रति घंटा अउर महाराष्ट्र व गोवा मा 60 किलोमीटर प्रति घंटा के रफतार से तेज हवा चलै क अनुमान जतावा गवा है।

उत्तर प्रदेश मा मौसम क हाल
उत्तर प्रदेश मा बरखा के गतिविधियां सीमित रहै क अनुमान है। मौसम बिभाग के मुताबिक, पूरबी उत्तर प्रदेश मा अलग-अलग जगहन मा हल्की से मध्यम बरखा होइ सकत है। मौसम बिभाग पूरबी अउर पच्छिमी उत्तर प्रदेश के कई हिस्सन मा तेज हवा, गरज-चमक अउर बिजली गिरै के साथै जम के बरखा होइ के संभावना जताइस है।

बिहार मा भारी बरखा क अलर्ट
बिहार मा 22 सितंबर का मौसम मिला-जुला रही अउर कुछ इलाकन मा हल्की से मध्यम बरखा होइ सकत है। मुला 23 सितंबर से मानसूनी बरखा जोर पकड़ी। 24 अउर 25 सितंबर का राज्य के कई जिलन मा मूसलाधार बरखा, गरज-चमक अउर गाज गिरै का लेके अलर्ट जारी कीन गा है।

दिल्ली-NCR मा कइसन रही मौसम?
राजधानी दिल्ली मा मंघर का मौसम मुख्य रूप से साफ रहै क अनुमान है। मौसम बिभाग के मुताबिक सबसे जादा तापमान 34 से 36 डिग्री अउर सबसे कम तापमान 23 से 25 डिग्री सेल्सियस के आसपास रही। दिन के टेम 15 से 18 किलोमीटर प्रति घंटा के रफतार से हवा चलै के संभावना है।

उत्तराखंड मा मानसून के स्थिति
उत्तराखंड मा हल्की से मध्यम बरखा के संभावना है। मौसम बिभाग 26 अउर 27 सितंबर का राज्य के जादातर हिस्सन मा बहुतै भारी बरखा अउर बिजली गिरै के चेतावनी जारी करे है।

राजस्थान मा खिली घाम
राजस्थान मा 22 सितंबर का मौसम मुख्य रूप से सूख रही अउर जादातर हिस्सन मा घाम निकरै के संभावना है। जयपुर अउर कोटा समेत जादातर जिलन मा सबसे जादा तापमान 37 डिग्री सेल्सियस के करीब रहि सकत है। हालांकि, पूरबी राजस्थान के कुछ सीमित इलाकन मा हल्की बौछार पड़ै क अनुमान है।

मध्य प्रदेश मा फिर से सक्रिय भा मानसून
मध्य प्रदेश के कई जिलन मा 22 सितंबर से मानसून एक बार फिर पूरी तरे सक्रिय होइ गवा है। यकरे वजह से राजधानी भोपाल, इंदौर, जबलपुर अउर ग्वालियर समेत कई इलाकन मा तेज बरखा, बिजली गिरै अउर आंधी का लेके मौसम बिभाग येलो अउर ऑरेंज अलर्ट जारी करे है।

महाराष्ट्र अउर गुजरात क हाल
महाराष्ट्र अउर गोवा मा मंघर का भारी बरखा अउर गरज-चमक के साथै बौछार पड़ै के संभावना है, जहां समुंदर किनारे वाले इलाकन मा 60 किमी प्रति घंटा के रफतार से हवा चलि सकत है। वहीं गुजरात अउर सौराष्ट्र-कच्छ इलाकन मा 50 किमी प्रति घंटा के रफतार से तेज हवा चलै अउर मध्यम से भारी बरखा क अनुमान है।

पूरब अउर दक्खिन भारत के राज्य
झारखंड, पच्छिम बंगाल, ओडिशा, छत्तीसगढ़ अउर पूरबोत्तर के सउभे आठों राज्यन मा भी अगले 24 से 48 घंटन मा हल्की से मध्यम बरखा जारी रही।