किसानन कय समसियन अउर खेती-बारी से जुरे मुद्दन पर मुख्यमंत्री रेखा गुप्ता किसानन के अगुआन के साथे बैठक कीन। मुख्यमंत्री जनसेवा सदन मा किसानन एमएसपी पर गेहूं कय खरीद फिर से सुरू करे अउर खेतन मा सोलर उर्जा का बढ़ावा देवे जइसन फइसलन कय सरहना कीन। योजना लागू होय मा देर होय क कारन ई बेर जादेत्तर किसान एमएसपी कय लाभ नाय पाय पायन, मुला अगली फसल कय लाभ इनहन का जरूर मिली।
मुख्यमंत्री जनसेवा सदन मा किसानन के प्रतिनिधिमंडल से मुलाकात कइके खेती, गांवन अउर किसानन के भलाई से जुरे मुद्दन पर चर्चा कीन। बैठक मा किसानन अपनी समसियन, खेती मा आवे वाली दिक्कतन अउर जरूरी मांगन का सामने रखिन। मुख्यमंत्री अधिकारियन का निर्देश दीन कि किसानन के हित से जुरे मामलन मा संवेदनशीलता के साथे काम कीन जाय अउर समसियन कय समय से निपटारा तय कीन जाय।
किसानन कय आमदनी बढ़ावे मा मिली मदद :
किसानन के अगुआन दिल्ली सरकार कय तरफ से न्यूनतम समर्थन मूल्य (एमएसपी) पर गेहूं कय खरीद फिर से सुरू करे के फइसला कय सुआगत कीन। एकरे साथे खेतन मा सोलर उर्जा का बढ़ावा देवे कय कोसिस का भी किसानन बढ़िया कदम बताइन। किसानन कय कहब रहा कि इससे खेती कय लागत कम करे अउर आमदनी बढ़ावे मा मदद मिली।
पीएम मोदी के बताय रस्ता पर सरकार :
मुख्यमंत्री रेखा गुप्ता कहेन कि प्रधानमंत्री मोदी के अगुवाई मा दिल्ली सरकार किसानन कय भलाई, खेती-बारी का मजबूत बनावे अउर गांवन के विकास खातिर लगातार काम करत अहै। उहईं भरोसा दिवाइन कि किसानन के हित से जुरे फइसलन का सबसे पहिले पूरा कीन जाई।
