योगी कहिन कि पलायन खाली खेती-बारी का नहीं बिगाड़त है, बल्कि ई हमार संस्कृति, रीति-रिवाज अउर पुरखन के धरोहर का भी धीरे-धीरे सिराय (खत्म) देत है।
योगी आदित्यनाथ अपने पुरखउती गांव पंचूर मां श्री विष्णु पंचदेव मंदिर के प्राण प्रतिष्ठा कार्यक्रम मां सामिल होय पहुंचेन हैं। उत्तर प्रदेश के मुख्यमंत्री योगी आदित्यनाथ उत्तराखंड मां बढ़त पलायन अउर बंजर होत खेतन पर चिंता जताइन। उइ कहिन कि पलायन खाली खेती-बारी का नहीं बिगाड़त है, बल्कि ई हमार संस्कृति, रीति-रिवाज अउर पुरखन के धरोहर का भी धीरे-धीरे सिराय देत है। योगी आदित्यनाथ अपने पुरखउती गांव पंचूर मां श्री विष्णु पंचदेव मंदिर प्राण प्रतिष्ठा कार्यक्रम मां सामिल होय पहुंचेन हैं।
उइ कहिन कि पलायन के वजह से लोग अपने गांव-गिरांव, जमीन अउर सांस्कृतिक पहचान से दूर होत जात हैं। ई स्थिति आगे के समय बरे बहुतै चिंता के बात है। उइ मनइन से अपनी जड़न अउर परंपरा का बचावे के अपील कीहिन। कहिन कि समय-समय पर दैवीय शकतिन के पूजा-पाठ अउर मेहनत के काम भी जरूरी अहैं, जेसे समाज अउर संस्कृति जिअत रहत है।
उइ कहिन कि जउन खेत कबहूं फसलन से लहलहात रहे, आज उहां झाड़-झंखाड़ भर गवा है। कय्यूं गांवन के हाल तौ अइसन है कि खेत मां एकौ दाना अन्न नहीं पैदा होत है। लोग जंगली जानवरन का खेती छोड़े के वजह बतावत हैं, मुला पहिलेहुं गांवन मां जंगली जानवर होत रहे। तबके लोग ढेर सचेत अउर सजग रहत रहे अउर खेती-बारी अउर आपन परंपरा से जुड़े रहत रहे।
उइ किसानन का खेती के नवा तरीका अपनावे के सलाह दीहिन। कहिन कि जउं जंगली जानवर गेंहू, धान अउर दाल जइसन फसलन का नुकसान पहुंचावत हैं, तौ मनइन का बागवानी की ओरी बढ़े के चाही। उइ बताइन कि पंचूर के लगे पोखरी गांव मां बाबा रामदेव के जरिए खुमानी, आड़ू अउर किन्नू जइसन फल बहुत नीक पैदा कीन जा रहे हैं, जेसे ई क्षेत्र के लोगन का नवा सीख मिलत है। उइ कहिन कि बंजर खेतन का फिर से आबाद करब समय के मांग है। सरकार भी किसानन अउर गांव वालेन का हर मुमकिन मदद देवे बरे तैयार है। जब खेत हरे-भरे होइहैं, तबै हमार संस्कृति, गांव अउर हमार वजूद सुरक्षित रहि पाई।
योगी सुनाविन एक नीक किस्सा
योगी आदित्यनाथ मंदिर बनै से जुड़ा एक बहुतै रोचक किस्सा सुनाविन। उइ बताइन कि जउन जगह पर आज विष्णु पंचदेव मंदिर बना है, उहां पहिले गांवन का जोड़े वाली सड़क बनत रही। मुला काम के दौरान बार-बार जेसीबी मशीन खराब होय जात रही। जब बार-बार अइसन होय लाग तौ लोग उनकर पास आइन अउर सब बात बताइन। उइ पुरान नक्सा अउर उह जगह के इतिहास देखिन तौ याद आवा कि उहां पहिले देवस्थल रहा, जहां गांव के लोग पूजा-पाठ अउर फूल-पाती चढ़ावत रहे।
एकरे बाद उइ सड़क बनावे वालेन का हुकुम दीहिन कि सड़क के रास्ता बदल दीन जाय अउर दक्खिन की ओरी से सड़क निकाली जाय। उइ अधिकारिन अउर गांव वालेन का ई भी समुझाइन कि ई जगह दैवीय आसथा से जुड़ी है, जब पहिली बार मशीन बिगड़ी रही तबै ई बात समझ लेवे के रही। पाछे जब गांव वाले अउर काम करे वाले लोग संकल्प लीहिन कि रास्ता बदलै के साथे उहां मंदिर भी बनवावा जाई, तबै बड़े सहज भाव से सड़क बन के तैयार होइ गइ। उइ कहिन कि अचंभे के बात ई रही कि ओकरे बाद न तौ कौनों मशीन खराब भई अउर न ही कौनों मजूरी करे वाले का कौनों नुकसान पहुंचा। योगी कहिन कि ई हमार आसथा, संस्कृति अउर दैवीय शकतिन के प्रति सम्मान के प्रतीक है। उइ मनइन से अपनी परंपरा, देवस्थल अउर सांस्कृतिक धरोहर का सहेज के रखे के आह्वान कीहिन।
पूजा-जागर मां कम होइ गय आसथा : योगी
योगी आदित्यनाथ कहिन कि हम लड़कपन मां देखत रहेन कि गांव-घर मां साल भर मां एक बार ‘जागर’ जरूर होत रहा, मुला पिछले कय्यूं सालन से हम गांवन मां जागर नहीं देखे अहन। गांव-देहात अउर मंदिरन मां देवी-देउतन का पूजै अउर जगाये रखे बरे जागर होब बहुत जरूरी है। बिसपत के रात साढ़े नौ बजे जब जागर शुरू भवा तौ लाग कि दैवीय शकतिन जाग गइ हैं। उइ कहिन कि पंचूर गांव मां नृसिंह भगवान के पुरान मंदिर का फिर से बनवाया गवा है। उहां रोज पूजा-पाठ होय के चाही। हमार देवी-देउता जागत रहे के चाही। आज हमका अपने नेतृत्व के साथे मजबूती से खड़ा होवे के जरूरत है।
“लड़िका योगी जी का बहुत पसंद करत हैं। जब योगी जी बच्चन का चॉकलेट अउर बिस्किट देत हैं तौ उनकर चेहरा खिल उठत है। योगी आदित्यनाथ के वजह से राष्ट्रीय स्तर पर यमकेश्वर के एक अलग पहिचान बनी है।” – सतपाल महाराज
“उन्ह माता का गोड़ लागित है, जउन योगी आदित्यनाथ जइसन पूत का जनम दीहिन। भारत माता के जय-जयकार पूरी दुनिया मां ई संदेसा देत है कि हम योगी जी के गांव मां अहन। पंचूर गांव मां भगवान विष्णु के मूरति के प्राण प्रतिष्ठा होब पूरे इलाका बरे गौरव के बात है। योगी जी तन, मन अउर आत्मा से सांचे योगी अहन।” – चिदानंद सरस्वती मुनि
“राम अउर कृष्ण का अहैं, ऋषिन के धरोहर का है, ई आज उत्तर प्रदेश के मुख्यमंत्री योगी आदित्यनाथ हम सबका बतावत हैं। आज पूरी दुनिया के नजर उत्तर प्रदेश पर है।” – बाबा रामदेव
