लखनऊ : उत्तर प्रदेश के मुख्यमंत्री योगी आदित्यनाथ शुकवार का गुजरात अउर महाराष्ट्र के स्थापना दिवस पर उहां के मनइन का बधाई दीहिन अउर देस की एकता, विकास अउर तरक्की मा उनके योगदान कै खूब बखान कीहिन। आदित्यनाथ सोशल मीडिया मंच ‘एक्स’ पर एक पोस्ट मा कहेन, “गुजरात के रहइय्या सबै मनइन का गुजरात राज्य के स्थापना दिवस कै गाढ़ा बधाई अउर शुभकामना।”
ओन्हैं कहेन कि राष्ट्रपिता महात्मा गांधी अउर लौह पुरुष भारत रत्न सरदार वल्लभभाई पटेल की ई पावन धरती देस का एकता, स्वावलंबन अउर सेवा कै डगर देखायस है। मुख्यमंत्री आगे कहेन कि ई मेहनत, उत्साह अउर सृजन कै पवित्र धरती परधानमंत्री नरेन्द्र मोदी के मार्गदर्शन अउर मुख्यमंत्री भूपेंद्र पटेल के अगुवाई मा विकास अउर खुसहाली के नवा कीर्तिमान बनावय, खुसहाली की नीक डगर पर बढ़त रहै, भगवान श्री सोमनाथ जी से हमार इहै बिनती है।
मुख्यमंत्री महराज महाराष्ट्र का कड़ी मेहनत, वीरता अउर तरक्की कै धरती बतावत भए महाराष्ट्र दिवस की बधाई दीहिन। ओन्हैं कहेन, “परिश्रम, पराक्रम अउर प्रगति की अनोखी धरती महाराष्ट्र राज्य के स्थापना दिवस पर सबै महाराष्ट्र वासियन का गाढ़ा बधाई अउर शुभकामना।”
मुख्यमंत्री इहौ कहेन कि क्रांति, सांति अउर सुराज (स्व-शासन) के विरासत के ताईं जानल जाय वाला ई राज्य परधानमंत्री मोदी के मार्गदर्शन अउर मुख्यमंत्री देवेंद्र फडणवीस के अगुवाई मा विकास के नवा मील के पत्थर हासिल करी। आदित्यनाथ दुइनौ राज्यन की बढ़त खुसहाली अउर तरक्की के ताईं कामना कीहिन। बताय दीन जाय कि ई दुइनौ राज्य एक मई, 1960 का वजूद मा आए रहें, जब उ समय के बंबई राज्य का गुजरात अउर महाराष्ट्र मा बाँट दीन गवा रहा।
