केंद्रीय मंत्री किरेन रिजिजू सोमवार का कहेंन कि सरकार का हर मुद्दे या सोशल मीडिया ट्रेंड पर प्रतिक्रिया देय क कौनों जरूरत नाइ बा। उई इ बात पर जोर दिहिन कि सरकार “गंभीर कामन” पर ध्यान लगावत है अउर देस क संचालन ओकरे चुने भाए प्रतिनिधियों द्वारा कीन जात है। डिब्रूगढ़ मा एएनआई से बात करत भये रिजिजू कहेंन कि हम गंभीर कामन मा लाग हन। हर बात पर प्रतिक्रिया देब ठीक नाइ बा… कुछु नाइ होई। जनता देस चलावत है। उई आपन वोट डारत हैं, अपने प्रतिनिधियों का चुनत हैं अउर देस क सेवा करत हैं। हम गंभीर मुद्दों पर ध्यान देत हन, मुला हर बात पर टिप्पणी करब जरूरी नाइ बा।
उनकर इ टिप्पणी ‘कॉकरोच जनता पार्टी’ आंदोलन पर आई है, जे भारत के मुख्य न्यायाधीश (सीजेआई) सूर्यकांत द्वारा अदालत क सुनवाई क दौरान कीन गय टिप्पणियन से जुड़े विवाद के बाद एक व्यंग्यात्मक ऑनलाइन विरोध के रूप मा सुरु भवा रहा। एक कानूनी याचिका पर एक मनई का फटकार लगावत भये, अदालत कथित तौर पर कम रोजगार पाय वाले जुआ सोशल मीडिया कार्यकर्ताओं का कॉकरोच अउर परजीवी कहिके संबोधित करे रही।
हालांकि मुख्य न्यायाधीश बाद मा साफ किहिन कि टिप्पणियन का गलत तरीका से पेस कीन गवा रहा अउर उनकर मकसद खाली फर्जी कानून क डिगरी इस्तेमाल करय वाले मनइन का निशाना बनाउब रहा, मुला तब तक नुकसान होइ चुका रहा। जनरेशन Z अउर मिलेनियल इंटरनेट उपयोगकर्ताओं “तिलचट्टा” (कॉकरोच) लेबल का गर्व क प्रतीक मानि लिहिन अउर एक व्यंग्यात्मक “राजनीतिक दल” बनाय लिहिन, जे डिजिटल माध्यमों पर मुख्यधारा क राजनीतिक संगठनों का भी पीछे छोड़ि दिहिस।
एक हफ्ता के भीतर, इ आंदोलन लाखों चाहय वालन का बटोरि लिहिस अउर पढ़ाई-लिखाई अउर रोजगार के क्षेत्रन मा ढांचागत कमियन का उजागर किहिस, जेकरे बाद सरकार अचानक एह पर कार्रवाई कइ दिहिस। इहे बीच, सुप्रीम कोर्ट मा एक जनहित याचिका (PIL) दायर कीन गइ है, जेहमा व्यंग्यात्मक संगठन “तिलचट्टा जनता पार्टी” (CJP) के खिलाफ अदालती कार्रवाई के दौरान कोर्ट द्वारा कीन गइ मौखिक टिप्पणियन क कथित रूप से दुरुपयोग अउर व्यावसायिक शोषण करय के आरोप मा कार्रवाई क मांग कीन गइ है।
वकील राजा चौधरी द्वारा दायर याचिका मा आरोप लगावा गवा है कि इ समूह ब्रांडिंग, प्रचार अउर डिजिटल माध्यमों से पइसा कमाय बरे कोर्ट क टिप्पणियन क इस्तेमाल किहिस। याचिका मा कहा गवा है, याचिकाकर्ता नम्रतापूर्वक गोहरावत है कि बाद क घटनाक्रम, जेहमा ‘कॉकरोच जनता पार्टी’ से जुड़ी गतिविधियां, कथित ट्रेडमार्क-व्यावसायिक दावे, ब्रांडिंग अभियान अउर पइसा कमाय बरे डिजिटल प्रसार सामिल हैं, पहली नजर मा न्यायिक विवाद अउर मौखिक अदालती बातचीत के संगठित व्यावसायिक दुरुपयोग का देखावत हैं।
