(KKR कै जीत से प्लेऑफ कै दौड़ अउरौ पेचीदा होइ गय है, अब टॉप-4 मा पहुँचै बरे टीमन के बीच जबरदस्त टक्कर मची है।)
सुरुआती मैचन मा बुरी तराह हारै वाली कोलकाता नाइट राइडर्स अब जीत की डगर मा वापसि आइ गय है। अउर उई अइसन वापसी किहिन हैं जेसे प्लेऑफ की लड़ाई अउरौ रोमांचक होइ गय है। कोलकाता सुकवार के दिल्ली कैपिटल्स का उनकै घरै मा आठ विकेट से हराय दिहिस। कोलकाता कै ई लगातार चौथी जीत आय, जेसे उ आईपीएल-2026 के प्लेऑफ की दौड़ मा आपन उम्मीद जगाए रक्खे है।
ई जीत के बाद अजिंक्य रहाणे की कप्तानी वाली कोलकाता अंक तालिका मा सातवें नंबर पर पहुँचि गय है। उनकै 10 मैचन मा चार जीत अउर पाँच हार के बाद नौ अंक हैं। सुरू के सात मैचन मा उनहिन का खाली एकै जीत मिली रही, जबकि एक मैच पानी बरसै के नाते रद होइ गवा रहा।
यहि तराह प्लेऑफ मा बनाइ सकत है जगह
जहाँ तक कोलकाता के प्लेऑफ मा जाइ की बात है, तौ ओका आपन बचे चारै मैच जीतै का परी। अगर उ चारै मैच जीति लेत है तौ ओकर 15 अंक होइ जइहैं। यहाँ ओका दूसरी टीमन के मैचन के नतीजन पर भी भरोसा करै का परी अउर उम्मीद करै का परी कि 10 मा से कम से कम ओका छोड़ के छह टीमें 15 अंक से नीचे रहि के लीग चरण खतम करैं। तबै उ प्लेऑप मा जाइ सकत है।
दिल्ली की राह भई कठिन
जहाँ तक दिल्ली की बात है, तौ उनकै प्लेऑफ की राह लगभग खतम होइ गय है। उनकै 11 मैचन मा चार जीत अउर सात हार के बाद आठ अंक हैं। अब अगर उ आपन सबौ तीन मैच जीतिहूँ लेत है, तौ ओकर खाली 14 अंक होइहैं। अबै के हाल देखत ई लागत है कि चार टीमें 14 अंक से जादा लइके सीजन खतम करिहैं। अइसन मा दिल्ली का प्लेऑफ मा जाइ बरे अब कोनो चमत्कारै की जरूरत परी।
बाकी टीमन कै का है हाल
बाकी टीमन के बारे मा बात कीन जाय तौ सनराइजर्स हैदराबाद 11 मैचन मा सात जीत अउर चार हार के साथ 14 अंक लइके पहले नंबर पर है। ओकरे बाद पंजाब किंग्स है जेकरे 10 मैचन मा छह जीत अउर तीन हार के बाद 13 अंक हैं। इन दुइनौ टीमन कै प्लेऑफ मा जाब लगभग तय है।
तीसरे नंबर पर आरसीबी है जेकरे 10 मैचन मा छह हार अउर चार जीत के बाद 12 अंक हैं। राजस्थान कै भी यहै हाल है, मुला ओकर नेट रन रेट आरसीबी से खराब है, यही नाते उ चौथे नंबर पर है। गुजरात टाइटंस कै नेट रन रेट राजस्थान से भी खराब है, यही से उ बराबर अंक लइके भी पांचवें नंबर पर है। दिल्ली अउर कोलकाता बरे असली चुनौती यहै तीन टीमें हैं।
पाँच बार की चैंपियन चेन्नई सुपर किंग्स 10 मैचन मा पाँच जीत अउर पाँच हार के साथ 10 अंक लइके छठे स्थान पर है। मुंबई 10 मैचन मा तीन जीत अउर सात हार के बाद छह अंक लइके नौवें नंबर पर है। यहै हाल लखनऊ कै है, मुला ओकर नेट रन रेट खराब है, यही नाते उ सबसे नीचे 10वें नंबर पर है।
slug: kkr-win-complicates-playoff-race-ipl-2026
