लखनऊ: उत्तर प्रदेश के सबसे लाम एक्सप्रेसवे मा गिने जाय वाले गंगा एक्सप्रेसवे पर अब मनइन का सफरी खातिर टोल टैक्स भरै का परी। परधानमंत्री नरेंद्र मोदी पिछले महीना जेकर उद्घाटन करे रहेन, ओही एक्सप्रेसवे पर शुरू मा मनइन का मुफत मा आवै-जाय के सुबिधा मिली रही, मुला अब ऊ छूट खतम होइ गय है।
करीब 594 किलोमीटर लाम ई एक्सप्रेसवे मेरठ से शुरू होइके प्रयागराज तक जात है अउर परदेस के कइयौ बड़े जिलन का आपस मा जोड़त है। एक्सप्रेसवे खुले के बाद 15 मई तक गाड़िन से कौनो पइसा नाहीं लीन गवा, मुला अब यूपीडा (UPEDA) की ओर से टोल के दर लागू कइ दीन गये हैं।
जउन रेट जारी कीन गा है ओकरे हिसाब से, दुपहिया वाहन, तिपहिया अउर ट्रैक्टर चलावै वालन का हर किलोमीटर पर 1.28 रुपिया टोल दै का परी। वंही कार, जीप, वैन अउर दूसर हलकी मोटर गाड़िन खातिर ई पइसा 2.50 रुपिया हर किलोमीटर के हिसाब से तय कीन गवा है।
सरकार के दावा है कि गंगा एक्सप्रेसवे से पछिम अउर पूरब उत्तर परदेस के बीच आवै-जाय मा टैम बहुत कम लागी अउर ब्योपार, पर्यटन अउर परिवहन का नया रफतार मिली। मुला टोल शुरू होय के बाद अब मनइन के जेब पर बढ़ती बोझ भी पड़ी।
याद रहे कि मेरठ से प्रयागराज तक फैला ई एक्सप्रेसवे परदेस के 12 जिलन का जोड़त है अउर एका उत्तर परदेस के अर्थबेबस्था खातिर ‘गेमचेंजर’ माना जात है। 15 दिन के टोल छूट दीन गयी रही, मुला अब जउन ई रस्ता से जइहैं उनका टोल भरै का परी।
