दुनिया के सबसे बड़हन बल्लेबाज मानय जाए वाले सचिन तेंदुलकर आईपीएल में बल्ला अउर गेंद के बीच बराबरी के मुकाबला खातिर कुछ सुझाव दिहे हैं। उ इम्पैक्ट प्लेयर वाला नियम खतम करे के बात कहे हैं, जौन उनके पहिले भी कई लोग कहि चुके हैं। रोहित शर्मा, हार्दिक पांड्या, अक्षर पटेल से लइके कई अउर मौजूदा क्रिकेटर भी इ नियम के बदले के बात कहे हैं। 2023 में लागू भवा इम्पैक्ट प्लेयर नियम के तहत टीम आपन प्लेइंग-11 में एक खिलाड़ी के मैच के दौरान बदल सकत है।
हटाव इ नियम
सचिन कहे हैं कि इ नियम के हटावे के चाही काहे से कि इ गेंदाबाज के खातिर पहिले से ही मुश्किल बने माहौल में बल्लेबाज के फायदा पहुंचावे जइसन है। सचिन ईएसपीएनक्रिकइंफो अवॉर्ड में बात करत कहे, “व्यक्तिगत तौर पर हमका इ लागत है कि इम्पैक्ट प्लेयर नियम के हटावे के चाही। हमका लागत है कि टी20 फॉर्मेट में जब आपके पास खाली 20 ओवर है अउर आप गेंदाबाज के खातिर पहिले से ही मुश्किल बने माहौल में एक अउर बल्लेबाज के जोड़ि देत अहा, तौ इ संतुलन बिगड़े जइसन लागत है।”
दिए हैं कुछ अउर सुझाव
सचिन आईपीएल में बल्ला अउर गेंद के बीच मची असंतुलन के बदले खातिर दुई अउर सुझाव दिहे हैं। उनका मानब है कि पावरप्ले के दुई हिस्सा में बांट देवे के चाही। साथ ही, पूरा मैच में एक गेंदाबाज के पांच ओवर फेंके के छूट मिलय। सचिन कहे, “छह ओवर के पावरप्ले में घेरा के बाहर खाली दुई फील्डर रहत हैं। इमें सुरु के चार ओवर बल्लेबाज के खातिर रहन दिय जाव जइसे अभी है फील्डिंग वैसी ही रही। ओकर बाद दुई ओवर गेंदाबाज के खातिर होवे के चाही अउर फील्डिंग वाली टीम के इ फैसला करे के चाही कि आखिरी दुई ओवर के पावरप्ले ओका कब लेवे के है। इमें एक एक्स्ट्रा फील्डर घेरा के बाहर होवे के चाही।”
