पत्र सूचना शाखा
(मुख्यमंत्री सूचना परिसर)
सूचना अउर जन सम्पर्क बिभाग, उ0प्र0
मुख्यमंत्री आगामी 02, 03 अउर 04 जुलाई का आयोजित होय वाली
उ0प्र0 शिक्षक पात्रता परीक्षा-2026 के तइयारी के समीक्षा किहिन
यू0पी0टी0ई0टी0 परदेस के लाखन नौजवानन के इच्छा से जुड़ बहुतै
जरूरी परीक्षा, एकर निष्पक्षता, पारदरसिता अउर बिसवासनीयता कउनो
भी हाल मा परभावित नाय हुअय का चाही : मुख्यमंत्री
मुख्यमंत्री नौकरी करत मास्टरन के हित के बरे
संवेदनशील नजरिया अपनाय के एक जरूरी फैसला लिहिन
उ0प्र0 सिच्छा सेवा चयन आयोग का नौकरी करत मास्टरन के बरे
अलग से शिक्षक पात्रता परीक्षा (टी0ई0टी0) आयोजित करै के निरदेस
हर एक अभ्यर्थी का सुरक्षित, बढ़िया बेवस्था वाला अउर बिना तनाव के
माहौल देब राज्य सरकार के सबसे बड़ी पराथमिकता
कउनो भी अभ्यर्थी का आवै-जाय, रहै, सुरक्षा या दूसर जरूरी
सुबिधा के कमी मा कउनो किसिम के दिक्कत के सामना न करै का परय
उ0प्र0 राज्य सड़क परिवहन निगम, रेलवे अउर जरूरत के हिसाब से निजी स्थानीय परिवहन
संचालकन के साथै तालमेल बइठाय के अउर गाड़ी-मोटर के बेवस्था करावा जाय
सब परीक्षा केन्द्रन पै पियै वाला पानी, साफ सौचालय, छाँह वाला बइठै के जगह,
बिना रुकावट के बिजली, आगी बुझावै के बेवस्था अउर अचानक जरूरत परै पै
दवाई-दारू के सुबिधा जरूर मौजूद रहय
अबही के मौसम का देखत भवा सेहत अउर
आफत-बिपत से निपटै वाला तंतर पूरी तरह से चालू रक्खा जाय
परीक्षा का बढ़िया अउर बिना गलती के चलावै बरे एक दिन
पहिले सब बेवस्था के अभ्यास जरूर कइ लिया जाय
सोशल मीडिया अउर दूसर माध्यमन पै अफवाह, भरमावै वाली या गलत सूचना
फइलावै के कोसिस पै कड़ी नजर रक्खै अउर अइसन मामलन
मा तुरतै अउर असरदार कारवाही पक्का करै के निरदेस
उ0प्र0 शिक्षक पात्रता परीक्षा-2026 के आयोजन परदेस के 60 जिला मा
बनावा गवा 955 परीक्षा केन्द्रन पै कीन जाई, परीक्षा मा कुल 19,94,661
अभ्यर्थी सामिल होइहयं
लखनऊ : 30 जून, 2026
मुख्यमंत्री योगी आदित्यनाथ जी कहे हयें कि उत्तर परदेस शिक्षक पात्रता परीक्षा-2026 (यू0पी0टी0ई0टी0) परदेस के लाखन नौजवानन के इच्छा से जुड़ बहुतै जरूरी परीक्षा आय। एकर निष्पक्षता, पारदरसिता अउर बिसवासनीयता कउनो भी हाल मा परभावित नाय हुअय का चाही। परीक्षा के संचालन खाली परसासनिक जिम्मेदारी नाय, बल्कि नौजवानन के भबिस्य के बरे सरकार के जवाबदेही के बात आय। हर एक अभ्यर्थी का सुरक्षित, बढ़िया बेवस्था वाला अउर बिना तनाव के माहौल देब राज्य सरकार के सबसे बड़ी पराथमिकता आय।
मुख्यमंत्री जी आजु हिंया आपन सरकारी घर पै बुलाई गइ एक बड़ी बैठक मा आवै वाले 02, 03 अउर 04 जुलाई का होय वाली उत्तर परदेस शिक्षक पात्रता परीक्षा-2026 के तइयारी के समीक्षा करत रहे। यहि मौका पै वीडियो कान्फ्रेंसिंग के जरिये सब जिलाधिकारी जुड़ रहे। उ निरदेस दिहिन कि परीक्षा मा सामिल होय वाले कउनो भी अभ्यर्थी का आवै-जाय, रहै, सुरक्षा या दूसर जरूरी सुबिधा के कमी मा कउनो किसिम के दिक्कत के सामना न करै का परय।
यहि मौका पै मुख्यमंत्री जी नौकरी करत मास्टरन के हित के बरे संवेदनशील नजरिया अपनाय के एक जरूरी फैसला लिहिन। उ कहिन कि शिक्षक पात्रता परीक्षा के अनिवार्यता का देखत भवा काम करत मास्टरन का आपन पात्रता पक्का करै बरे भरपूर मौका देब जाय का चाही। यही मकसद से उ उत्तर परदेस सिच्छा सेवा चयन आयोग का नौकरी करत मास्टरन के बरे अलग से शिक्षक पात्रता परीक्षा (टी0ई0टी0) आयोजित करै के निरदेस दिहिन, ताकि ओनका अउर मौका मिलि सकय अउर खाली मौका के कमी मा कउनो मास्टर का दिक्कत के सामना न करै का परय।
मुख्यमंत्री जी कहिन कि परीक्षा के बीच बड़ी गिनती मा अभ्यर्थी परदेस के अलग-अलग जिला के साथै दूसर राज्यन से भी अइहयं। अइसन मा रेलवे इस्टेसन, बस अड्डा अउर खास यातायात केन्द्रन पै पूरा मदद के बेवस्था पक्का कीन जाय। अभ्यर्थिन का परीक्षा केन्द्र तक पहुँचै मा कउनो किसिम के दिक्कत न होय। उत्तर परदेस राज्य सड़क परिवहन निगम, रेलवे अउर जरूरत के हिसाब से निजी स्थानीय परिवहन चलावै वालेन के साथै तालमेल बइठाय के अउर गाड़ी-मोटर के बेवस्था करावा जाय। परीक्षा के पहिले अउर बाद होय वाली भीड़ का देखत भवा असरदार यातायात बेवस्था कीन जाय अउर जरूरत परै पै खास बेवस्था भी पक्का कीन जाय। उ निरदेस दिहिन कि बड़ी गिनती मा नौजवानन के आवै-जाय के बीच खाय-पियै के चीज के दाम बेमतलब न बढ़ावा जाय।
मुख्यमंत्री जी निरदेस दिहिन कि सब परीक्षा केन्द्रन पै पियै वाला पानी, साफ सौचालय, छाँह वाला बइठै के जगह, बिना रुकावट के बिजली, आगी बुझावै के बेवस्था अउर अचानक जरूरत परै पै दवाई-दारू के सुबिधा जरूर मौजूद रहय। अबही के मौसम का देखत भवा सेहत अउर आफत-बिपत से निपटै वाला तंतर पूरी तरह से चालू रक्खा जाय। हर एक जिला मा बनावा गवा कंट्रोल रूम असरदार ढंग से काम करय अउर कउनो भी सूचना पै तुरतै कारवाही पक्का कीन जाय। उ सब जिलाधिकारिन का निरदेस दिहिन कि परीक्षा का बढ़िया अउर बिना गलती के चलावै बरे एक दिन पहिले सब बेवस्था के अभ्यास जरूर कइ लिया जाय।
मुख्यमंत्री जी कहिन कि परीक्षा के सुद्धता सबसे ऊपर आय। परीक्षा ड्यूटी मा खाली साफ-सुथरी छबि वाले अफसरन अउर करमचारिन के ही तैनाती कीन जाय। गोपनीय परीक्षा सामग्री के भण्डारन, आवाजाही अउर परीक्षा के बाद आयोग तक ओकर सुरक्षित भेजावै के पूरी परकिरिया सबसे बढ़िया सुरक्षा मानक के हिसाब से पूरी करावा जाय। उ सोशल मीडिया अउर दूसर माध्यमन पै अफवाह, भरमावै वाली या गलत सूचना फइलावै के कोसिस पै कड़ी नजर रक्खै अउर अइसन मामलन मा तुरतै अउर असरदार कारवाही पक्का करै के निरदेस दिहिन।
मुख्यमंत्री जी का बतावा गवा कि उत्तर परदेस शिक्षक पात्रता परीक्षा-2026 के आयोजन परदेस के 60 जिला मा बनावा गवा 955 परीक्षा केन्द्रन पै कीन जाई। परीक्षा आवै वाले 02 से 04 जुलाई तक कुल पाँच पाली मा आयोजित होइ। 02 जुलाई का दुइनौ पाली मा उच्च पराथमिक स्तर के परीक्षा होइ। 03 जुलाई का पहिली पाली मा उच्च पराथमिक अउर दूसरी पाली मा पराथमिक स्तर के परीक्षा आयोजित कीन जाई। 04 जुलाई का पहिली पाली मा पराथमिक स्तर के परीक्षा खतम होइ।
बैठक मा बतावा गवा कि परीक्षा मा कुल 19,94,661 अभ्यर्थी सामिल होइहयं। यिनमा 17,67,180 अभ्यर्थी उत्तर परदेस के हयें, जबकि 2,27,481 अभ्यर्थी दूसर राज्यन से परीक्षा देवै अइहयं। परीक्षा मा 1,85,791 नौकरी करत मास्टर अउर
18,08,870 नये अभ्यर्थी सामिल होइहैं। प्राथमिक स्तर बदे 3,88,179, ऊँच प्राथमिक स्तर बदे 8,16,436 अउर दुनउ स्तरन बदे 3,95,023 अभ्यार्थिन आवेदन किहे अहइँ।
बइठकी मा इउ बतावा गवा कि सबसे जादा परीक्षा केन्द्र अउर अभ्यार्थिन वाले जिलन मा वाराणसी, प्रयागराज, लखनऊ, गोरखपुर, कानपुर नगर, मेरठ, मऊ, मुरादाबाद, आगरा अउर जौनपुर खास अहइँ। वाराणसी मा 68 परीक्षा केन्द्रन पर 1,27,239 अभ्यर्थी परीक्षा देइहैं। प्रयागराज मा 53 परीक्षा केन्द्रन पर 76,634 अउर लखनऊ मा 43 परीक्षा केन्द्रन पर 76,720 अभ्यर्थी परीक्षा मा सामिल होइहैं। इ जिलन मा बाहर के जिलन अउर दूसर राज्जन से बड़ी गिनती मा अभ्यार्थिन के आवै का देखत, आवाजाही, सुरक्षा, डाक्टरी मदद अउर रहै-ठहरै वाली इंतजामन पर खास धियान दिया जात अहइ।
——–
