रक्षा मंत्री राजनाथ सिंह मंगलवार का किर्गिस्तान के राजधानी बिश्केक मा शंघाई सहयोग संगठन (एससीओ) के बैठक के दौरानै चीन, रूस अउर बेलारूस के आपन साथी मंत्रिन से मुलाकात कीहिन। चीन के रक्षा मंत्री एडमिरल डोंग जून से मिलै मा वास्तविक नियंत्रण रेखा (एलएसी) पर शांति अउर स्थिरता बनाए रखै के साथै-साथ क्षेत्रीय सुरक्षा के चिंता पर बात भई। ई बैठक अइसन समइ मा भई है, जब भारत अउर चीन अपने खराब संबंधन का सुधारे के कोसिस करत अहैं।
राजनाथ सिंह एक पोस्ट मा कहेन कि बिश्केक मा एससीओ रक्षा मंत्रिन के बैठक के बीच चीन के रक्षा मंत्री एडमिरल डोंग जून से बात कइके बहुतै खुशी भई। रक्षा मंत्रालय बताइस कि राजनाथ अउर डोंग क्षेत्रीय अउर दुनिया भर के सुरक्षा, खास कइके पश्चिम एशिया मा जउन कुछ होइ रहा है, ओकरे बारे मा आपन विचार साझा कीहिन।
मिली जानकारी के हिसाब से, दुनऊ मंत्रिन एलएसी के हाल-चाल पर भी चर्चा कीहिन अउर सरहद पर शांति अउर भाईचारा बनाए रखै के जरूरत पर जोर दीन। एकरे साथै राजनाथ सिंह रूस के रक्षा मंत्री आंद्रेई बेलोसोव से भी मिलेन। उईं एक पोस्ट मा बताएन् कि बेलोसोव के साथै बातचीत नीक रही। पता चला है कि दुनऊ नेता भारत का एस-400 वायु रक्षा मिसाइल के सप्लाई सहित रक्षा खरीद के तमाम प्रोजेक्ट पर बात कीहिन।
राजनाथ सिंह बेलारूस के रक्षा मंत्री लेफ्टिनेंट जनरल विक्टर से भी मुलाकात कीहिन। उनकर बातचीत दुनऊ देसन के बीच रक्षा नाता मजबूत करै पर रही। रक्षा मंत्रालय बताइस कि राजनाथ सिंह कहेन कि भारत बेलारूस के साथ मिलके काम करै अउर साझेदारी बढ़ावे का बहुत महत्व देत है। उईं ट्रेनिंग अउर क्षमता बढ़ावे का आपसी सहयोग के मुख्य हिस्सा बताएन्। एकरे अलावा, रक्षा मंत्री किर्गिज अउर कजाख रक्षा मंत्रिन के साथै भी अलग-अलग बैठक कीहिन।
