शरीर का चंगा रखै बरे विटामिन B12 एक बहुतै जरूरी पोषक तत्व आय। ई देही मा खून बनावै, दिमाग अउर नसिन का दुरुस्त रखै अउर शरीर मा फुर्ती बनाय रखै मा मदद करत है।
काहे से कि विटामिन B12 ज्यादातर एनिमल-बेस्ड (मांसाहारी) खाना मा मिलत है, यहि तरे शाकाहारी लोगन मा इकर कमी ढेर देखि जात है। अइसन मा कुछ सेहतमंद ड्रिंक्स के सहारे इकर कमी का पूरा कीन जा सकत है।
तौ आवा जानित है शरीर मा विटामिन B12 कय कमी का पूरा करै वाले नीक ड्रिंक्स के बारे मा:
दूध: दूध विटामिन B12 कय सबसे सहज अउर नीक जरिया आय। रोज सकारे या रात मा एक गिलास दूध पियै से B12 के साथै-साथै कैल्शियम अउर प्रोटीन भी मिलत है, जेहसे हड्डिन अउर नसिन मा जान आवत है।
लस्सी: दही से बनी लस्सी सुवाद मा नीक होवै के साथै-साथै विटामिन B12 से भरी होत है, जेहसे हाजमा नीक रहत है अउर देही का ठंडक मिलत है।
मट्ठा (छाछ): मट्ठा हलुक, पाचक अउर ताकती ड्रिंक आय। एमा मौजूद नीक बैक्टीरिया अउर विटामिन B12 पेट अउर शरीर दुइनौ का चंगा रखत हैं।
फोर्टिफाइड सोया मिल्क: जे लोग दूध नाहीं पियत हैं, उनके बरे फोर्टिफाइड सोया मिल्क बहुतै नीक विकल्प आय। एमा विटामिन B12 अउर प्रोटीन दुइनौ मिलत है।
फोर्टिफाइड ओट्स मिल्क: ओट्स मिल्क मा जब विटामिन B12 मिलावा जात है तौ ई बहुतै सेहतमंद ड्रिंक बन जात है। ई दिल बरे भी नीक होत है अउर शरीर का ताकत भी देत है।
केला अउर पीनट बटर स्मूदी: दूध, केला अउर पीनट बटर से बनी स्मूदी बड़ी पौष्टिक होत है। दूध के नाते एमा विटामिन B12 मिलत है अउर ई वजन बढ़ावै या कमजोरी दूर करै मा भी काम आवत है।
न्यूट्रिशनल यीस्ट ड्रिंक: न्यूट्रिशनल यीस्ट का पानी, सूप या स्मूदी मा मिलाय के पिय जा सकत है। ई विटामिन B12 कय नीक स्रोत आय, खास तौर पे शाकाहारी मनइन बरे।
व्हे प्रोटीन ड्रिंक: व्हे प्रोटीन का दूध मा मिलाय के पियै से शरीर का प्रोटीन के साथै विटामिन B12 भी मिलत है। ई मांसपेसियन अउर ऊर्जा बरे बहुतै नीक रहत है।
विटामिन B12 कय महत्व: विटामिन B12 देही मा लाल खून के कन (रेड ब्लड सेल्स) बनावै, नसिन कय सिस्टम दुरुस्त रखै, डीएनए बनावै, दिमाग तेज रखै अउर शरीर मा फुर्ती बनाय रखै बरे बहुतै जरूरी है। इकर कमी से एनीमिया, बहुतै थकावट, डिप्रेशन, भूलै कय बेमारी अउर नसिन से जुड़ी दिक्कतें होय सकत हैं, यहि नाते विटामिन B12 से भरी चीजन का रोज खाय-पियै का चाही।
