जूतन के सहारे घर मा घुसिन हें घातक बैक्टीरिया अउर केमिकल्स, होय जाव सावधान!

जबै आप कहीं बाहर से घर लौटत अहा, तब आपन जूता-चप्पल बाहरै उतारत अहा कि घरै मा पहिरिके चले आवत अहा? आप सोचत होइहौ कि ई सवाल केहन बेतुका आय, पर असल मा ई आपके अउर आपके परिवार की सेहत बदे बहुत मायने रखत अहै। सच तो ई है कि जब आप बाहर से आवत अहा, तब अपने जूतन के साथे कइयौ अनचाहे मेहमान भी लइ आवत अहा। जूतन मा लागी माटी से खाली गन्दगी नाहीं फैलत, बल्कि इनमा बैक्टीरिया भी छिपल रहत हें, जेहसे बीमारी होय सकत है। यहि ताईं घर मा घुसत घरी जूतन का बाहरै उतारब जरूरी अहै। आवा जानल जाय यहिके बारे मा अउर कुछ खास बातें।

जूतन के तरुवा मा चिपके बैक्टीरिया

साल 2008 मा भई एक रिसर्च मा ई पावा गवा कि लगभग 80% जूतन के निचला हिस्सा (तरुवा) मा फीकल बैक्टीरिया यानी मल मा पाय जाय वाले कीटाणु मिलेन। ई बैक्टीरिया अक्सर पब्लिक टॉयलेट्स के फर्श से जूतन मा चिपक जात हें अउर हमरे साथे घर तक चले आवत हें। यहिके अलावा, बाहर कुकुरन अउर चिरइन की बीट (dropings) आदि मा मौजूद बैक्टीरिया भी हमरे जूतन के तरुवा मा चिपक जात हें। अस्पताल जैसी जगहिन पर तौ अउरौ ढेर जर्म्स होत हें। एक दूसरी रिसर्च मा पता चला कि 65% डॉक्टर्स के जूतन पर एंटीबायोटिक-प्रतिरोधी MRSA या एंटरोकोकस फेकेलिस जैसे आँतन मा पाय जाय वाले बैक्टीरिया मिलेन।

केहन फर्श पर जादा टिकत हें बैक्टीरिया?

न्यू यॉर्क सिटी के नॉर्थइस्टर्न यूनिवर्सिटी मा साल 2023 मा भई एक स्टडी मा सड़क के बरसात वाला पानी, जूतन के तरुवा अउर यूनिवर्सिटी के फर्श के नमूने लीन गय रहेन। यहि स्टडी मा पावा गवा कि लरिकन अउर मास्टरो के जूतन मा उहई बैक्टीरिया रहेन, जे बाहर सड़क पर रहेन। यहि वजह से यूनिवर्सिटी के भीतर वाला हिस्सा भी गन्दा पावा गवा, खास तौर से उहई जगह जहाँ कालीन (carpet) बिछा रहा। कालीन वाली जगहिन पर बैक्टीरिया के फैलाव सबसे जादा रहा।

केमिकल्स भी आवत हें घर मा

जूता खाली बैक्टीरिया नाहीं, बल्कि अउरौ कई खराब चीजन का घर के भीतर लइ आवत हें। PFAS अइसन केमिकल्स हें, जे पर्यावरण अउर हमरे शरीर मा कइयौ सालन तक बने रहत हें। यहि ताईं इनका ‘फॉरएवर केमिकल’ भी कहा जात है। ई भी जूतन के साथे घर मा चले आवत हें। यहिके अलावा, घर बनवावे या मरम्मत के काम के घरी उड़े वाली लीड डस्ट (सीसा वाली धूल) भी जूतन मा चिपक जात है। खेतन अउर घर के फुलवारी मा इस्तेमाल होय वाली कीटनाशक दवाइयाँ भी जूतन के सहारे घर मा घुस जात हें।

घर के बाहर जूता उतारब है बहुतै जरूरी

साल 2023 के एक पोल के हिसाब से, लगभग 63% अमेरिकी घर पहुँचतई नियम से आपन जूता बाहर उतार देत हें। उहईं, 24% मनई अपने घर आवे वाले पाहुनन से भी जूता बाहर उतारे का कहत हें। सेहत के नजर से देखल जाय तौ घर के बाहर जूता उतारब एक बहुतै समझदारी वाला काम साबित होय सकत है।